പത്തനംതിട്ട: 80-ാം വയസിൽ കന്നിവോട്ട് രേഖപ്പെടുത്തി വൃദ്ധ ദമ്പതികൾ. പത്തനംതിട്ട അടൂരിലാണ് വോട്ട് രേഖപ്പെടുത്തുന്നതിനായി വൃദ്ധ ദമ്പതികളെത്തിയത്. വിദേശത്തായിരുന്ന ദമ്പതികൾ കൊവിഡ് സമയത്താണ് നാട്ടിലെത്തിയത്. ഇന്ത്യൻ പൗരനെന്ന അവകാശം പൂർണമായി നേടിയെടുക്കാൻ വേണ്ടിയാണ് ഈ പ്രായത്തിലും കന്നിവോട്ട് ചെയ്യാനെത്തിയതെന്ന് ദമ്പതികൾ പ്രതികരിച്ചു.
“വോട്ടവകാശത്തിന് മുമ്പ് വിദേശത്തായിരുന്നു. ആദ്യം നോർത്ത് ഇന്ത്യയിലായിരുന്നു. പിന്നീട് അവിടെ നിന്ന് മസ്കറ്റിലേക്ക് പോയി. കൊവിഡ് കാലത്താണ് തിരിച്ച് നാട്ടിലെത്തിയത്. ഇന്ത്യൻ പൗരനാകുന്നുവെന്ന് സ്ഥിരീകരണം ഉണ്ടാകുന്നതിനും ആ അവകാശം നേടിയെടുക്കാനും വേണ്ടിയാണ് ഈ പ്രായത്തിലും വോട്ട് ചെയ്യാനെത്തിയത്”.
“ജനാധിപത്യ ഉത്സവത്തിൽ പങ്കാളിയായപ്പോൾ അഭിമാനവും സന്തോഷവും തോന്നുന്നു. ഇന്ത്യൻ പൗരനായി ജീവിക്കണം എന്ന് തന്നെയാണ് ആഗ്രഹം. അതുകൊണ്ട് വിദേശത്തെ പൗരത്വം സ്വീകരിച്ചില്ല. നമ്മുടെ ജനാധിപത്യ രീതി നേരിട്ട് കണ്ട് അറിഞ്ഞതിൽ സന്തോഷമുണ്ട്. ആദ്യ വോട്ട് ചെയ്യണമെന്ന് വാശിയും ഉണ്ടായിരുന്നു. അതുകൊണ്ടാണ് അതിരാവിലെ വന്ന് വോട്ട് രേഖപ്പെടുത്തിയത്”- ദമ്പതികൾ പറഞ്ഞു.
പത്തനംതിട്ട ജില്ലയിൽ കനത്ത പോളിംഗാണ് നടക്കുന്നത്. വെയിലും ചൂടും വകവെക്കാതെ കന്നിവോട്ടർമാരടക്കം നിരവധി വോട്ടർമാരാണ് പോളിംഗ് ബൂത്തുകളിലേക്ക് എത്തികൊണ്ടിരിക്കുന്നത്. എൻഡിഎയ്ക്ക് വലിയ പ്രതീക്ഷയാണ് പത്തനംതിട്ട മണ്ഡലത്തിൽ നിന്ന് ലഭിക്കുന്നത്.