ഫഹദ് ഫാസിലിനെ കേന്ദ്ര കഥാപാത്രമാക്കി ജിത്തു മാധവന്‍ സംവിധാനം ചെയ്ത ആവേശത്തിന്റെ വിജയക്കുതിപ്പാണ് എങ്ങും കേൾക്കുന്നത്. ഫഹദ് ഫാസിലിന്റെ ഉഗ്രൻ പ്രകടനമാണ് ചിത്രത്തിലൂടെ കാണാൻ സാധിച്ചതെന്നാണ് പ്രേക്ഷകർ ഒന്നടങ്കം അഭിപ്രായപ്പെടുന്നത്. ചിത്രത്തെ കുറിച്ച് വാനോളം പുകഴ്‌ത്തുന്ന നയൻതാരയുടെ ഇൻസ്റ്റഗ്രാം സ്റ്റോറിയാണ് സമൂഹമാദ്ധ്യമങ്ങളിൽ ഇപ്പോൾ ശ്രദ്ധേയമാകുന്നത്.
ആവേശത്തിന്റെ പിന്നിൽ പ്രവർത്തിച്ച എല്ലാവരെയും പ്രശംസിച്ചുകൊണ്ടാണ് നയൻതാരയുടെ സ്റ്റോറി. ‘സൂപ്പർ സ്റ്റാർ’ എന്നാണ് ഫഹദിനെ വിശേഷിപ്പിച്ചിരിക്കുന്നത്. ഭാവിയിൽ വരാനിരിക്കുന്ന സിനിമകൾക്ക് പോലും ജിത്തു മാധവന്റെ സംവിധാനം പ്രചോദനമാകുമെന്നും നയൻതാര പ്രശംസിച്ചു. കൂടാതെ ചിത്രത്തിന്റെ നിർമാതാക്കളായ നസ്റിയ നസീമിനെയും അൻവർ റഷീദിനെയും നയൻതാര അഭിനന്ദിക്കുന്നുണ്ട്.
ചിത്രത്തിൽ തകർപ്പൻ ഗാനങ്ങൾ സമ്മാനിച്ച സംഗീത സംവിധായകൻ സുഷിൻ ശ്യാമിനെയും ഛായഗ്രാഹകൻ സമീർ താഹിറിനെയും നയൻസ് സ്റ്റോറിയിൽ പരാമർശിക്കുന്നു. ചിത്രത്തിലെ മറ്റ് താരങ്ങളായ ആശിഷ് വിദ്യാർത്ഥി, സജിൻ ഗോപു, റോഷൻ, ഹിപ്സ്റ്റർ എന്നിവരെയും നയൻതാര അഭിനന്ദിക്കുന്നുണ്ട്.
കോമഡിക്കും ആക്ഷൻ സീനുകൾക്കും പ്രധാന്യം നൽകിയ ചിത്രം യുവതലമുറയാണ് ഏറ്റെടുത്തിരിക്കുന്നത്. രംഗണ്ണൻ എന്ന കഥാപാത്രം ഫഹദിനല്ലാതെ മറ്റാർക്കും ചെയ്യാനാകില്ലെന്ന് ഉൾപ്പെടെയുള്ള അഭിപ്രായങ്ങളാണ് പ്രേക്ഷകരുടെ ഭാഗത്ത് നിന്ന് വരുന്നത്. 120 കോടിയാണ് ആവേശം ഇതുവരെ നേടിയത്.
