തിരുവനന്തപുരം: പൊതുസ്ഥലത്തെ റിപ്പോർട്ടിങ്ങിനിടെ വനിതാ മാദ്ധ്യമപ്രവർത്തകയ്ക്ക് നേരെ അതിക്രമം നടത്തിയ പ്രതിയെ ജാമ്യമില്ലാ വകുപ്പ് ചുമത്തി ഉടൻ അറസ്റ്റ് ചെയ്യണമെന്ന് കേരള പത്രപ്രവർത്തക യൂണിയൻ ജില്ലാ കമ്മിറ്റി ആവശ്യപ്പെട്ടു. വഞ്ചിയൂർ കോടതി പരിസരത്ത് വച്ച് കെഎസ്ആർടിസി ഡ്രൈവർ യദുവിന്റെ പ്രതികരണം തേടുന്നതിനിടെ മാദ്ധ്യമപ്രവർത്തകർക്കിടയിലേക്ക് കയറിയ ഒരാൾ ‘ജനം’ ടിവി റിപ്പോർട്ടറോട് അതിക്രമം കാട്ടുകയായിരുന്നു. സഹപ്രവർത്തകർ ചെറുത്തതോടെ ഇയാൾ കോടതിവളപ്പിലേക്ക് ഓടി രക്ഷപ്പെട്ടു. ഇതു സംബന്ധിച്ച് മാദ്ധ്യമ പ്രവർത്തക പൊലീസിൽ പരാതി നൽകിയിട്ടുണ്ട്.
പൊതുനിരത്തുകളിൽ പോലും വനിതാ മാദ്ധ്യമപ്രവർത്തകർക്ക് നേരെ ആക്രമണം നടക്കുന്നത് മാദ്ധ്യമസ്വാതന്ത്ര്യത്തിന് മേലുള്ള വെല്ലുവിളിയാണെന്നും ശക്തമായ നടപടി സ്വീകരിക്കാൻ പൊലീസും ഭരണാധികാരികളും തയാറാകണമെന്നും കെയുഡബ്ല്യുജെ ജില്ലാ പ്രസിഡന്റ് ഷില്ലർ സ്റ്റീഫനും ജില്ലാ സെക്രട്ടറി അനുപമ ജി.നായരും ആവശ്യപ്പെട്ടു.
