മലയാളികൾ ഏറെ ആവേശത്തോടെ കേട്ട സിനിമാ പ്രഖ്യാപനങ്ങളിൽ ഒന്നായിരുന്നു ഒറ്റക്കൊമ്പൻ. സുരേഷ് ഗോപിയെ നായകനാക്കി മാത്യൂസ് തോമസ് സംവിധാനം ചെയ്യുന്ന മാസ്- ആക്ഷൻ ചിത്രം. സിനിമയുടെ ഒരു അനൗൺസ്മെന്റ് ടീസറും അണിയറ പ്രവർത്തകർ പുറത്തിറക്കിയിരുന്നു. സുരേഷ് ഗോപിയുടെ മാസ് ലുക്ക് തന്നെയായിരുന്നു ഇതിലെ പ്രധാന ആകർഷണം. മലയാളത്തിലെ ഫയർ ബ്രാൻഡ് തന്റെ പഴയ ട്രാക്കിലേക്ക് വീണ്ടും എത്തുന്നു എന്നത് സിനിമാപ്രേമികളെ ആവേശം കൊള്ളിച്ചു.
എന്നാൽ ചില സാങ്കേതിക പ്രശ്നങ്ങളാൽ ഒറ്റക്കൊമ്പന്റെ ഷൂട്ടിംഗ് നീണ്ടുപൊയി. സിനിമ ഇനി ഉണ്ടാവില്ല എന്നുപോലും വാർത്തകൾ വന്നിരുന്നു. എന്നാൽ ഇത് തെറ്റാണെന്നും ഒറ്റക്കൊമ്പൻ ഉറപ്പായും തിയേറ്ററിൽ എത്തുമെന്നും നിർമ്മാതാവായ ടോമിച്ചൻ മുളകുപാടം വ്യക്തമാക്കിയിരുന്നു. എന്നിരുന്നാലും പുതിയ അപ്ഡേറ്റുകൾ ഒന്നും വരാത്തതിനാൽ ആരാധകരുടെ പ്രതീക്ഷകൾ നഷ്ടമായി. എന്നാൽ ഇപ്പോഴിതാ വീണ്ടും സമൂഹമാധ്യമങ്ങളിൽ ഒറ്റക്കൊമ്പന്റെ വരവ് ചർച്ചയാവുകയാണ്.
സുരേഷ് ഗോപിയുടെ പുതിയ ഫോട്ടോയാണ് ഒറ്റക്കൊമ്പൻ ചർച്ചകൾക്ക് സോഷ്യൽ മീഡിയയിൽ തിരികൊളുത്തിയിരിക്കുന്നത്. നരച്ച താടിയും മീശയുമായി ഒറ്റക്കൊമ്പൻ ലുക്കിലാണ് സുരേഷ് ഗോപി പ്രത്യക്ഷപ്പെട്ടിരിക്കുന്നത്. ഇതേ ലുക്കിലുള്ള ഒരു വീഡിയോയും സമൂഹമാധ്യമങ്ങളിൽ അടുത്തിടെ വൈറലായിരുന്നു. എന്തായാലും പുതിയ ലുക്ക് സുരേഷ് ഗോപി ആരാധകർ ഏറ്റെടുത്തിരിക്കുകയാണ്. ഒറ്റക്കൊമ്പൻ ഉറപ്പായും വരുമെന്ന വിശ്വാസത്തിലാണ് സിനിമാ പ്രേമികളും.
