മനാമ: ബഹറിൻ ശ്രീ മുത്തപ്പൻ സേവാ സംഘം തിങ്കളാഴ്ച (ജൂൺ 17) തിരുവപ്പന മഹോത്സവം
നടത്തുന്നു. ബഹറിൻ കേരളീയ സമാജത്തിൽ വച്ചാണ് പരിപാടി. രാവിലെ 7 മണി മുതൽ വൈകിട്ട് 9 വരെ നടക്കുന്ന പരിപാടിയിൽ മുത്തപ്പൻ, തിരുവപ്പന തെയ്യകോലങ്ങൾ അവതരിപ്പിക്കും.
രാവിലെ 11 മണി മുതൽ ഉച്ചയ്ക്ക് മൂന്ന് മണിവരെ അന്നദാനവും ഉണ്ടായിരിക്കും.
വൈകിട്ട് ആറുമണിക്ക് രവി പിള്ള ഹാളിൽ നടക്കുന്ന സാംസ്കാരിക പരിപാടിയിൽ ബഹറിനിലെ പ്രമുഖ വ്യക്തിത്വങ്ങൾ പങ്കെടുക്കും. കേരള ഫോക്ലോർ അക്കാദമിയുടെ ഈ വർഷത്തെ ഗുരുപൂജ അവാർഡ് ജേതാവ് രവീന്ദ്രൻ കൊയിലത്തിന് ബഹറിൻ ശ്രീ മുത്തപ്പൻ മടപ്പുര സ്നേഹാദരം നൽകും. മഹോത്സവത്തിന്റെ മുഖ്യ കോലധാരിയായിരുന്നു അദ്ദേഹം.
ബഹറിനിലെ സാമൂഹ്യ പ്രവർത്തകരായ വള്ളുംപറമ്പത്ത് പണിക്കശ്ശേരി നന്ദകുമാർ (മടപ്പുര കലാശ്രേഷ്ഠ പുരസ്കാരം 24) ഫൈസൽ പട്ടാണ്ടിയിൽ (മടപ്പുര സേവാശ്രേഷ്ഠ പുരസ്കാരം 24) എന്നിവർക്ക് പുരസ്കാരങ്ങൾ നൽകി ആദരിക്കും. ഈ വർഷത്തെ സിബിഎസ്ഇ 10, 12 ക്ലാസുകളിൽ ഉന്നത വിജയം നേടിയ മടപ്പുര കുടുംബാംഗങ്ങളുടെ കുട്ടികളെയും ആദരിക്കും.
ജാതിമതഭേദമന്യേ ഏവരും പങ്കെടുക്കുന്ന തിരുവപ്പന മഹോത്സവത്തിന് കഴിഞ്ഞ വർഷങ്ങളിലെ പോലെ ഈ വർഷവും ബഹറിൻ പ്രവാസി ജനതയുടെ മുഴുവൻ സഹകരണവും ബഹറിൻ ശ്രീ മുത്തപ്പൻ സേവാസംഘം ഭാരവാഹികൾ അഭ്യർത്ഥിച്ചു. സ്റ്റാർ വിഷൻ മീഡിയ എംഡി സേതുരാജ് കടയ്ക്കൽ, ജനറൽ കൺവീനർ സതീഷ് മുതലിൽ തുടങ്ങിയവർ പരിപാടികൾ വിശദീകരിച്ച് സംസാരിച്ചു. അരുൺകുമാർ (ട്രഷറർ), ശ്രീജിത്ത് (ട്രസ്റ്റ് അംഗം) മോഹൻദാസ് എന്നിവരും പങ്കെടുത്തു. ജോയിന്റ് സെക്രട്ടറി സൂരജ് നമ്പ്യാർ സ്വാഗതം ആശംസിച്ച പരിപാടിയിൽ പ്രസിഡന്റ് സുനേഷ് സാസ്കോ അധ്യക്ഷത വഹിച്ചു.