സിനിമാപ്രേമികൾ ആവേശത്തോടെ കാത്തിരിക്കുന്ന ഉണ്ണിമുകുന്ദൻ ചിത്രമാണ് മാർക്കോ. ഹനീഫ് അദേനി തിരക്കഥ എഴുതി സംവിധാനം ചെയ്യുന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടിരിക്കുകയാണ് അണിയറ പ്രവർത്തകർ. ഉണ്ണി മുകുന്ദന്റെ ഇതുവരെ കണ്ടിട്ടില്ലാത്ത കൊടൂര കഥാപാത്രമായിരിക്കും മാർക്കോ എന്ന് അടിവരയിട്ട് പറയുന്നതാണ് പുതിയ പോസ്റ്റർ. ചോരപുരണ്ട കത്തി കടിച്ചുപിടിച്ച് രക്തത്തിൽ കുളിച്ചു നിൽക്കുന്ന ഉണ്ണിമുകുന്ദനെയാണ് പോസ്റ്ററിൽ കാണാൻ കഴിയുന്നത്. “അവരുടെ കാരണങ്ങൾ അവസാനിച്ചപ്പോൾ, അവന്റെ കത്തി ആരംഭിച്ചു” എന്നാ അടിക്കുറിപ്പോടെയാണ് ഫസ്റ്റ് ലുക്ക് റിലീസ് ചെയ്തിരിക്കുന്നത്.
നിവിൻ പോളിയെ നായകനാക്കി ഹനീഫ് അദേനി സംവിധാനം ചെയ്ത മിഖായേൽ എന്ന ചിത്രത്തിലെ വില്ലൻ കഥാപാത്രം ആയിരുന്നു മാർക്കോ ജൂനിയർ. ഈ കഥാപാത്രത്തെ കേന്ദ്ര കഥാപാത്രമാക്കി പുറത്തിറക്കുന്ന സിനിമയാണ് മാർക്കോ. ആക്ഷനും റിവഞ്ചിനും വയലൻസിനും പ്രാധാന്യം നൽകിക്കൊണ്ട് ഒരുക്കുന്ന സിനിമ പ്രേക്ഷകരെ ഞെട്ടിക്കുമെന്ന് ഉറപ്പ്. കെജിഎഫിലൂടെ പ്രേക്ഷകരെ ത്രസിപ്പിച്ച രവി ബസ്രൂർ പശ്ചാത്തല സംഗീതം ഒരുക്കുന്നു എന്ന പ്രത്യേകതയും മാർക്കോയ്‌ക്ക് ഉണ്ട്. ആക്ഷന് ഏറെ പ്രാധാന്യമുള്ള ചിത്രത്തിൽ കലൈ കിംഗ്സൺ, സ്റ്റണ്ട് സിൽവ, ഫെലിക്സ് എന്നീ മുൻനിര സ്റ്റണ്ട് മാസ്റ്റേഴ്സ് ഒരുക്കുന്ന എട്ടോളം വൻ സംഘട്ടനരംഗങ്ങൾ അടങ്ങുന്നു.
ഹൈ ബഡ്ജറ്റിൽ പുറത്തിറങ്ങുന്ന ചിത്രം നിർമ്മിക്കുന്നത് ക്യൂബ്സ് ഇന്റർനാഷണൽ, ഉണ്ണി മുകുന്ദൻ ഫിലിംസ് ബാനറുകൾ ചേർന്നാണ്. ഉണ്ണി മുകുന്ദനെ കൂടാതെ സിദ്ദിഖ്, ജഗദീഷ്, ആൻസൺ പോൾ തുടങ്ങി വൻ താരനിര തന്നെ മാർക്കോയിൽ അണിനിരക്കുന്നു. ഛായാഗ്രഹണം – ചന്ദ്രു സെൽവരാജ്, എഡിറ്റിംഗ്- ഷമീർ മുഹമ്മദ്, കലാസംവിധാനം – സുനിൽ ദാസ്, മേക്കപ്പ് – സുധി സുരേന്ദ്രൻ, കോസ്റ്റ്യൂം ഡിസൈൻ -ധന്യാ ബാലകൃഷ്ണൻ തുടങ്ങിയവരാണ് മറ്റു അണിയറ പ്രവർത്തകർ.
