ന്യൂഡൽഹി: പ്രോ-ടേം സ്പീക്കറായി മുതിർന്ന പാർലമെന്റ് അംഗം ഭർതൃഹരി മഹ്താബിനെ നിയമിച്ച് രാഷ്ട്രപതി ദ്രൗപദി മുർമു. സ്പീക്കറുടെ തെരഞ്ഞെടുപ്പ് നടക്കുന്നത് വരെ ഭരണഘടനയുടെ ആർട്ടിക്കിൾ 95 (1) പ്രകാരം ഭർതൃഹരി പ്രോ-ടേം സ്പീക്കറായി തുടരും.
ലോക്സഭയുടെ ആദ്യ സിറ്റിംഗിൽ അദ്ധ്യക്ഷത വഹിക്കുന്ന പ്രോ-ടേം സ്പീക്കർ പുതുതായി തെരഞ്ഞെടുക്കപ്പെട്ട എംപിമാർക്ക് സത്യവാചകം ചൊല്ലിക്കൊടുക്കും. 18-ാമത് ലോക്സഭയുടെ സ്പീക്കർ തെരഞ്ഞെടുപ്പിന് മേൽനോട്ടം വഹിക്കുന്നതും ഭർതൃഹരിയായിരിക്കും.
പാർലമെന്റിലെ ഏറ്റവും മുതിർന്ന അംഗത്തിനാണ് പ്രോ-ടേം സ്പീക്കറുടെ ചുമതല നൽകുക. ഒഡിഷയിൽ നിന്നുള്ള ബിജെപി നേതാവാണ് ഭർതൃഹരി. കട്ടക്കിൽ നിന്ന് ഏഴ് തവണയാണ് അദ്ദേഹം പാർലമെന്റിലേക്ക് തിരഞ്ഞെടുക്കപ്പെട്ടത്. ഒഡിഷ മുൻ മുഖ്യമന്ത്രി ഹരേകൃഷ്ണ മഹ്താബിന്റെ മകനാണ്. 2024ലെ ലോക്സഭാ തെരഞ്ഞെടുപ്പിന് മുന്നോടിയായിട്ടായിരുന്നു ബിജു ജനതാ ദളുമായി പിരിഞ്ഞ് അദ്ദേഹം ബിജെപിയിലെത്തിയത്.
ജൂൺ 26നാണ് സ്പീക്കർ തെരഞ്ഞെടുപ്പ്. 24ന് പുതിയ ലോക്സഭയുടെ ഉദ്ഘാടന സമ്മേളനം ആരംഭിക്കും. ജൂലൈ മൂന്നിനാണ് സമ്മേളനം അവസാനിക്കുക.
