പ്യോങ് യാങ്: ഉത്തര കൊറിയൻ ഭരണാധികാരി കിം ജോങ് ഉന്നിനെ പാസഞ്ചർ സീറ്റിലിരുത്തിയുള്ള പുടിന്റെ കാർ സവാരി സമൂഹ മാധ്യമങ്ങളിൽ വൈറലായി. റഷ്യൻ നിർമ്മിത കാറായ ഓറസ് ലിമോസിനിൽ ഇരു നേതാക്കളും യാത്രചെയ്യുന്നതിന്റെ വീഡിയോയാണ് വൈറലായത്.
റഷ്യൻ സ്റ്റേറ്റ് ടിവിയാണ് ആദ്യം ഈ ദൃശ്യങ്ങൾ പുറത്തുവിട്ടത്. പുടിനാണ് ഡ്രൈവിംഗ് സീറ്റിലുളളത്. 24 വർഷങ്ങൾക്ക് ശേഷം പുടിൻ നടത്തിയ ഉത്തരകൊറിയൻ സന്ദർശനം കഴിഞ്ഞ ദിവസങ്ങളിൽ വാർത്തയായിരുന്നു. ഇതിന് പിന്നാലെയാണ് ഇരുവരുടെയും കാർ സവാരിയുടെ ദൃശ്യങ്ങളും ചർച്ചയാകുന്നത്.
🇷🇺 🇰🇵 President Vladimir Putin driving North Korea’s Kim Jong Un in a brand new Aurus Russian luxury car. pic.twitter.com/N4ceb2ZWvV
— BRICS News (@BRICSinfo) June 20, 2024
കിം ജോങ് ഉന്നിന്റെ ആരോഗ്യ നിലയെക്കുറിച്ച് പല തരത്തിലുളള ഊഹാപോഹങ്ങളും ചർച്ചകളും പുറത്തു നടക്കുന്നതിനിടെയാണ് ഇരുവരുടെയും കാർ യാത്രയുടെ ദൃശ്യങ്ങൾ എന്നതും ശ്രദ്ധേയമാണ്. അപൂർവ്വമായിട്ടാണ് കിം ജോങ് ഉൻ ഇത്തരം യാത്രകൾക്ക് തയ്യാറാകുന്നത്.
കറുത്ത നിറത്തിലുളള സായുധ വാഹനത്തിലാണ് ഇരുവരും യാത്ര ചെയ്തത്. റഷ്യയിൽ പുടിന്റെ ഔദ്യോഗിക കാറാണ് ഓറസ് ലിമോസിൻ. ഒടുവിൽ വാഹനം നിർത്തി പുറത്തിറങ്ങിയ ഇരുവരും ഒരുമിച്ച് നടക്കുന്നതും സൗഹൃദം പങ്കിട്ട് നീങ്ങുന്നതുമാണ് ദൃശ്യങ്ങളിലുളളത്. രണ്ട് ഉദ്യോഗസ്ഥരും ഇവരെ അനുഗമിക്കുന്നുണ്ട്.
കഴിഞ്ഞ ഫെബ്രുവരിയിൽ കിമ്മിന് പുടിൻ റഷ്യൻ നിർമിത ലിമോസിൻ സമ്മാനമായി നൽകിയിരുന്നു. ഈ വരവിന് ഇതേ മോഡൽ മറ്റൊരു വാഹനം കൂടി നൽകിയെന്നും റിപ്പോർട്ടുകളുണ്ട്. വാഹനപ്രേമി കൂടിയായ കിം ജോങ് ഉന്നിനെ സന്തോഷിപ്പിക്കാനായിരുന്നു പുടിന്റെ ലക്ഷ്യം.
യുഎൻ ഉപരോധം നിലനിൽക്കുന്നതിനാൽ ഉത്തരകൊറിയയിലേക്ക് ആഡംബര വാഹനങ്ങളും മറ്റും കയറ്റി അയയ്ക്കാൻ സാധിക്കില്ല. എന്നാൽ കിം ജോങ് ഉന്നിന്റെ വാഹനശേഖരത്തിൽ നിരവധി വിദേശ ആഡംബര വാഹനങ്ങൾ ഉണ്ടെന്നാണ് റിപ്പോർട്ടുകൾ.