സോൾ: ദക്ഷിണ കൊറിയയിൽ ലിഥിയം ബാറ്ററി നിർമ്മാണ ശാലയിൽ ഉണ്ടായ തീപിടിത്തത്തിൽ 16 പേർക്ക് ദാരുണാന്ത്യം. തലസ്ഥാന നഗരമായ സോളിന് തെക്ക് ഹ്വസിയോങ് നഗരത്തിൽ തിങ്കളാഴ്ചയാണ് സംഭവം. അപകടത്തിൽ ഏഴ് പേർക്ക് പരിക്കേൽക്കുകയും ആറ് പേരെ കാണാതാവുകയും ചെയ്തിട്ടുണ്ട്.
ഫാക്ടറിയിൽ ജോലി ചെയ്തിരുന്നവരാണ് അപകടത്തിൽ മരിച്ചതെന്ന് അഗ്നിശമന സേന ഉദ്യോഗസ്ഥനായ കിം ജിൻ യങ് പറഞ്ഞു. ഫാക്ടറി തൊഴിലാളികളിൽ ഭൂരിഭാഗം പേരും ചൈനീസ് സ്വദേശികളാണെന്നും മൊബൈൽ സിഗ്നൽ ട്രാക്ക് ചെയ്ത് കാണാതായവർക്കായി തിരച്ചിൽ തുടരുകയാണെന്നും യങ് കൂട്ടിച്ചേർത്തു.
തൊഴിലാളികൾ ബാറ്ററികൾ പരിശോധിച്ച് പാക്ക് ചെയ്യുന്നതിനിടെയാണ് തീപിടിത്തം ഉണ്ടായത്. അതേസമയം തീപിടിത്തത്തിന്റെ കാരണത്തെക്കുറിച്ച് അന്വേഷണം ആരംഭിച്ചിട്ടുണ്ട്. തീപിടിത്തമുണ്ടായ സമയത്ത് ഏകദേശം 102 തൊഴിലാളികളാണ് ഫാക്ടറിക്കുള്ളിലുണ്ടായിരുന്നത്.
