റിലീസ് അടുക്കാനിരിക്കെ കൽക്കി 2898 എഡിയുടെ ടിക്കറ്റ് വിലയിൽ വൻ വർദ്ധനവ്. ആന്ധ്രയിൽ സിംഗിൾ സ്ക്രീനിൽ 75 രൂപയും മൾട്ടിപ്ലക്സിൽ 125 രൂപയുമാണ് ഉയർത്തിയത്. തെലങ്കാനയിൽ ഇത് 75 രൂപയും 100 രൂപയുമാണ് വർദ്ധിപ്പിച്ചത്.
ചിത്രത്തിന്റെ നിർമാതാവിന്റെ അഭ്യർത്ഥന പ്രകാരമാണ് സർക്കാർ കൽക്കിയുടെ ടിക്കറ്റ് വില ഉയർത്തിയത്. റിലീസ് ചെയ്ത് ആദ്യ 14 ദിവസത്തേക്കാണ് നിരക്ക് ഉയർത്തിയിരിക്കുന്നത്.
പ്രഭാസ് വ്യത്യസ്ത വേഷത്തിലെത്തുന്ന ചിത്രത്തിനായി ഏറെ ആകാംക്ഷയോടെയാണ് പ്രേക്ഷകർ കാത്തിരിക്കുന്നത്. ഇതിഹാസ കാവ്യമായ മഹാഭാരതത്തെ ആസ്പദമാക്കിയാണ് ചിത്രം ഒരുങ്ങുന്നത്. നാഗ് അശ്വിൻ സംവിധാനം ചെയ്യുന്ന ചിത്രത്തിൽ അമിതാഭ് ബച്ചൻ, ദീപിക പദുക്കോൺ, കമൽഹാസൻ എന്നിവരും പ്രധാന വേഷങ്ങൾ ചെയ്യുന്നു.
കഴിഞ്ഞ ദിവസമാണ് കൽക്കിയുടെ ട്രെയിലർ റിലീസ് ചെയ്തത്. ഇന്ത്യൻ സിനിമയുടെ അത്ഭുത സൃഷ്ടിയെന്ന് വിശേഷിപ്പിക്കാവുന്ന തരത്തിലുള്ള ബ്രഹ്മാണ്ഡ ട്രെയിലറായിരുന്നു അണിയറപ്രവർത്തകർ പുറത്തുവിട്ടത്. കാശി, കോംപ്ലക്സ്, ശംഭാള എന്നിങ്ങനെ പേരുള്ള മൂന്ന് ലോകങ്ങളുടെ കഥയാണ് ‘കല്ക്കി 2898 എഡി’ പറയുന്നത്. അശ്വത്ഥാമാവായി അമിതാഭ് ബച്ചനും യാസ്കിനായി കമല്ഹാസനും ഭൈരവയായി പ്രഭാസും സുമതിയായി ദീപിക പദുക്കോണുമാണ് ചിത്രത്തിലെത്തുന്നത്.
