ഗോകുൽ സുരേഷ്, ഗണേഷ് കുമാർ, അജു വർഗീസ്, അനാർക്കലി മരക്കാർ തുടങ്ങിയവരെ പ്രധാന കഥാപാത്രങ്ങളാക്കി അരുൺ ചന്തു സംവിധാനം ചെയ്ത ചിത്രമാണ് ഗഗനചാരി. മലയാളത്തിൽ ഇന്നേവരെ കണ്ടിട്ടില്ലാത്ത ഒരു പരീക്ഷണ ചിത്രം. സിനിമയെ ഇരുകൈയും നീട്ടിയാണ് പ്രേക്ഷകർ സ്വീകരിച്ചത്. ഇതിന് പിന്നാലെ ഗഗനചാരി യൂണിവേഴ്സിൽ പുതിയ ഒരു ചിത്രം കൂടി അണിയറ പ്രവർത്തകർ പ്രഖ്യാപിച്ചിരുന്നു. സുരേഷ് ഗോപി നായകനാകുന്ന ‘മണിയൻ ചിറ്റപ്പൻ’. ഈ ചിത്രത്തെ പറ്റി കൂടുതൽ വെളിപ്പെടുത്തിയിരിക്കുകയാണ് ഗോകുൽ സുരേഷ്. പുതിയ ചിത്രം ഗഗനചാരി റീലോഡഡ് ആയിരിക്കുമെന്ന് താരം പ്രതികരിച്ചു.
“സയന്റിസ്റ്റ് ഒരു ജെയിംസ് ബോണ്ട് ആയാൽ എങ്ങനെയിരിക്കും. അങ്ങനെ ഒരു സാധനമാണ് അടുത്തത് ചെയ്യുന്നത്. നിയോഗം പോലെ ആ കഥാപാത്രം ചെയ്യാൻ അച്ഛൻ ഓൺ ആയി ഇരിക്കുകയാണ്. മണിയൻ ചിറ്റപ്പൻ എന്ന ടൈറ്റിൽ കാണുമ്പോൾ തോന്നുന്നതൊന്നും ആയിരിക്കില്ല സിനിമയിൽ വരുമ്പോൾ. ഒരു ഗഗനചാരി റീലോഡഡ് ആയിരിക്കും”.
“സീനിയർ ആളായതുകൊണ്ടും പലതരത്തിലുള്ള കഥാപാത്രങ്ങൾ ചെയ്തിട്ടുള്ളതിനാലും ഒരു പരിധിയിൽ കൂടുതൽ അച്ഛൻ ആവേശത്തിൽ ഒന്നുമല്ല. ഗഗനചാരി റിലീസിനും രണ്ടു വർഷങ്ങൾക്ക് മുൻപ് ഈയൊരു സബ്ജക്ട് അച്ഛനുമായി ഞാനും അരുൺ ചന്തുവും സംസാരിച്ചിരുന്നതാണ്. ഇപ്പോൾ ഞങ്ങളെ കുറച്ചുകൂടി വിശ്വാസമാണ് അച്ഛന്. ഒരു മോഷൻ പോസ്റ്റർ മാത്രമാണ് പുറത്തിറക്കിയത്. അതൊന്നുമല്ല മണിയൻ ചിറ്റപ്പൻ”-ഗോകുൽ സുരേഷ് പറഞ്ഞു.
