എറണാകുളം: പെരുമ്പാവൂരിൽ ഇതര സംസ്ഥാനത്തൊഴിലാളിയെ കുത്തിക്കൊലപ്പെടുത്തി പ്രതി രക്ഷപ്പെട്ടു. ഒഡിഷ സ്വദേശി ആകാശ് ഡിഗൽ ആണ് കൊല്ലപ്പെട്ടത്. ഇന്ന് രാവിലെ 7.30 ഓടെയാണ് സംഭവം നടന്നത്.
ആകാശ് താമസിച്ചിരുന്ന കെട്ടിടത്തിലെ മറ്റൊരു താമസക്കാരനായ അഞ്ജന നായിക്കുമായി വാക്കുതർക്കങ്ങൾ നിലനിന്നിരുന്നു. ഇതേത്തുടർന്ന് ഇന്ന് രവിലെയും ഇരുവരും തമ്മിൽ വഴക്കുണ്ടായി. ഇതിന്റെ പ്രകോപനത്തിൽ ആകാശിനെ, നായിക്ക് കത്തിയെടുത്ത് കുത്തുകയായിരുന്നു. ഗുരുതരമായി പരിക്കേറ്റ ആകാശിനെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
വട്ടയ്ക്കാട്ടുപടി സ്വദേശി ബിജുവിന്റെ ഉടമസ്ഥതയിലുള്ള കെട്ടിടത്തിലാണ് ആകാശ് കുടുംബമായി താമസിച്ചിരുന്നത്. സംഭവശേഷം പ്രതി ഓടി രക്ഷപ്പെട്ടു. ഇയാൾക്കായുള്ള അന്വേഷണം ആരംഭിച്ചതായി പൊലീസ് പറഞ്ഞു. മൃതദേഹം മറ്റ് നടപടികൾക്ക് ശേഷം ബന്ധുക്കൾക്ക് വിട്ടുനൽകും.