കോപ്പയിലെ മുൻ ചാമ്പ്യമാരായ അർജന്റീനയ്‌ക്ക് സെമി ഫൈനലിൽ കാനഡയ്‌ക്കെതിരെ രണ്ട് ഗോളിന്റെ ജയം. ടൂർണമെന്റിലെ മെസിയുടെ ആദ്യ ഗോളിനാണ് ആരാധകർ സാക്ഷ്യം വഹിച്ചത്. ആദ്യ പകുതിയിൽ ജൂലിയൻ അൽവാരസും രണ്ടാം പകുതിയിൽ നായകൻ മെസിയും ഗോൾ വല തകർത്തതോടെ കാനഡയുടെ ഫൈനൽ മോഹങ്ങൾക്ക് വിലങ്ങിട്ടു. എതിരില്ലാത്ത രണ്ട് ഗോളുകൾക്കാണ് അർജന്റീനയുടെ ജയം. 15ന് നടക്കുന്ന ഫൈനലിൽ യുറഗ്വായ്- കൊളംബിയ മത്സരത്തിലെ വിജയികളെ അർജന്റീന നേരിടും.
തുടക്കം മുതൽ തന്നെ അർജന്റീനയ്‌ക്കെതിരെ ഗോളടിക്കാനുള്ള ശ്രമങ്ങൾ കാനഡ നടത്തിയെങ്കിലും അർജന്റീനയുടെ ഗോൾ വല തകർക്കാനായില്ല. 23-ാം മിനിറ്റിൽ ജൂലിയൻ അൽവാരസിന്റെ ഗോളിലൂടെ അർജന്റീന, കാനഡയ്‌ക്കെതിരായുള്ള ആദ്യ ഗോൾ നേടി.
51-ാം മിനിറ്റിലാണ് ടൂർണമെന്റിലെ തന്നെ മെസിയുടെ ആദ്യ ഗോൾ പിറന്നത്. എൻസോ ഫെർണാണ്ടസ് നൽകിയ പാസ് കനേഡിയൻ താരത്തിന്റെ കാലിലെത്തിയെങ്കിലും ബോക്‌സിന് പുറത്തുകടത്താൻ ശ്രമിച്ച പന്ത്, മെസിയുടെ കാലിൽ തട്ടി ഗോൾ വലയിലാവുകയായിരുന്നു. ഓഫ്‌സൈഡാണെന്ന് കനേഡിയൻ താരങ്ങൾ വാദിച്ചതോടെ ചെക്കിങ് നടത്തിയ ശേഷമാണ് ഗോൾ സാധുവാക്കിയത്.
