ന്യൂഡൽഹി: സമൂഹ മാദ്ധ്യമമായ എക്സിൽ 100 മില്യൺ ഫോളോവേഴ്സ് എന്ന നേട്ടം സ്വന്തമാക്കിയ പ്രധാനമന്ത്രി നരേന്ദ്ര മോദിയെ അഭിനന്ദിച്ച് ബിജെപി ദേശീയ അദ്ധ്യക്ഷൻ ജെപി നദ്ദ. മോദിയുടെ ഈ നേട്ടം ഒരു സുപ്രധാന നാഴികക്കല്ലാണെന്നും അദ്ദേഹത്തിന്റെ വളർച്ചയുടെയും ജനപിന്തുണയുടെയും തെളിവ് കൂടിയാണെന്നും നദ്ദ പറഞ്ഞു. ഈ നേട്ടം കൈവരിച്ച ആദ്യത്തെ ആഗോള നേതാവാണ് മോദിയെന്നും അദ്ദേഹം ചൂണ്ടിക്കാട്ടി.
“എക്സിൽ 100 മില്യൺ ഫോളോവേഴ്സ് എന്ന അത്യപൂർവ നാഴികക്കല്ലാണ് പ്രധാനമന്ത്രി നരേന്ദ്ര മോദി പിന്നിട്ടിരിക്കുന്നത്. ഇത് അദ്ദേഹത്തിന്റെ വളർച്ചയുടെയും ജനപിന്തുണയുടെയും അംഗീകാരമാണ്. ഈ നേട്ടം കൈവരിക്കുന്ന ആദ്യത്തെ ആഗോള നേതാവാണ് മോദി. അദ്ദേഹത്തിന്റെ ചലനാത്മക നേതൃത്വത്തിന് കീഴിൽ ഇന്ത്യക്ക് ലോക വേദികളിൽ സ്വീകാര്യത ലഭിച്ചു. സമ്പൽ സമൃദ്ധിയുടെയും പ്രത്യാശയുടെയും ഭാവിയിലേക്കുള്ള പ്രകാശമായി മാറാൻ ഭാരതത്തിന് കഴിഞ്ഞു,” നദ്ദ പറഞ്ഞു.
ഇന്നലെയാണ് മൈക്രോ ബ്ലോഗിംഗ് സൈറ്റായ എക്സിൽ ഏറ്റവുമധികം യൂസേഴ്സ് ഫോളോ ചെയ്യുന്ന ആഗോളനേതാവെന്ന ഖ്യാതി മോദി സ്വന്തമാക്കിയത്. 100 മില്യൺ ഫോളോവേഴ്സ് ആണ് എക്സിൽ നരേന്ദ്ര മോദിയെ പിന്തുടരുന്നത്. യുഎസ് പ്രസിഡന്റ് ജോ ബൈഡനേക്കാളും (38.1 മില്യൺ), ദുബായ് ഭരണാധികാരി ഷെയ്ഖ് മുഹമ്മദിനേക്കാളും (11.2 മില്യൺ) ഫ്രാൻസീസ് മാർപാപ്പയേക്കാളും (18.5 മില്യൺ) ബഹുദൂരം മുന്നിലാണ് പ്രധാനമന്ത്രി നരേന്ദ്രമോദി. 2009ലാണ് മോദി ട്വിറ്ററിൽ ജോയിൻ ചെയ്തത്.
