ഒരുമിച്ച് നിന്ന് ട്രംപിനെ തോൽപ്പിക്കണം; കമല ഹാരിസ് പുതിയ പ്രസിഡന്റ് സ്ഥാനാർത്ഥി, നിർദേശിച്ച് ജോ ബൈഡൻ

വാഷിംഗ്ടൺ: ഡെമോക്രാറ്റിക് പാർട്ടി സ്ഥാനാർത്ഥിയായി കമല ഹാരിസിനെ നിർദേശിച്ച് ജോ ബൈഡൻ. പ്രസിഡന്റ് സ്ഥാനാർത്ഥിയായി കമലയെ പിന്തുണയ്‌ക്കുന്നുവെന്ന് ബൈഡൻ എക്‌സിലൂടെ അറിയിച്ചു. നിലവിലെ യുഎസ് വൈസ് പ്രസിഡന്റ് കൂടിയായ കമലാ ഹാരിസ്, യുഎസ് പ്രസിഡന്റ് തെരഞ്ഞെടുപ്പിൽ പങ്കെടുക്കുന്ന ആദ്യ ഇന്ത്യൻ വംശജയായ വനിതയാകും. സ്ഥാനാർത്ഥിത്വത്തിൽ നിന്ന് പിന്മാറിയതിന് പിന്നാലെയാണ് ബൈഡൻ കമല ഹാരിസിന്റെ പേര് നിർദേശിച്ചത്. അടുത്ത മാസം 19ന് ഷിക്കാഗോയിൽ ആരംഭിക്കുന്ന നാഷണൽ കൺവെഷനിൽ പുതിയ സ്ഥാനാർത്ഥിയുടെ പേര് ഔദ്യോഗികമായി പ്രഖ്യാപിക്കും.

ഡെമോക്രാറ്റിക് പാർട്ടിയുടെ പുതിയ സ്ഥാനാർത്ഥി കമല ഹാരിസിന് പൂർണ പിന്തുണ നൽകുമെന്ന് ബൈഡൻ പ്രഖ്യാപിച്ചു. ഒറ്റക്കെട്ടായി നിന്ന് ട്രംപിനെ പിന്തുണയ്‌ക്കണമെന്നും അദ്ദേഹം പാർട്ടി നേതൃത്വത്തോടും അനുയായികളോടും അഭ്യർത്ഥിച്ചു. കമലാ ഹാരിസിന്റെ തെരഞ്ഞെടുപ്പ് പ്രചാരണത്തിന് സംഭാവന ചെയ്യാനുള്ള ലിങ്കും ബൈഡൻ എക്‌സിൽ പങ്കുവച്ചിട്ടുണ്ട്. ബൈഡൻ തന്നെ പ്രസിഡന്റ് സ്ഥാനാർത്ഥിയായി നിർദേശിച്ചതിൽ സന്തോഷമുണ്ടെന്നും തെരഞ്ഞെടുപ്പിൽ വിജയിക്കാൻ കഴിയുമെന്നാണ് പ്രതീക്ഷിക്കുന്നതെന്നും കമലാ ഹാരിസ് പ്രതികരിച്ചു.

My fellow Democrats, I have decided not to accept the nomination and to focus all my energies on my duties as President for the remainder of my term. My very first decision as the party nominee in 2020 was to pick Kamala Harris as my Vice President. And it’s been the best… pic.twitter.com/x8DnvuImJV

— Joe Biden (@JoeBiden) July 21, 2024

“>

പാർട്ടിയുടെയും രാജ്യത്തിന്റെയും താത്പര്യം മുൻനിർത്തി തെരഞ്ഞെടുപ്പിൽ നിന്ന് പിന്മാറുന്നുവെന്ന കാര്യം ഇന്നലെയാണ് ജോ ബൈഡൻ വാർത്താ കുറിപ്പിലൂടെ അറിയിച്ചത്. യുഎസ് തെരഞ്ഞെടുപ്പിന് 4-മാസം ബാക്കിയുള്ളപ്പോഴാണ് ബൈഡന്റെ പിന്മാറ്റം.

പ്രസിഡന്റ് സ്ഥാനത്തേക്കുള്ള മത്സരത്തിന് മുന്നോടിയായി നടന്ന ആദ്യഘട്ട സംവാദത്തിൽ ബൈഡൻ, ഡോണൾഡ് ട്രംപിനോട് അടിപതറുന്ന കാഴ്ചയാണ് കാണാനായത്. ഇതിന് പിന്നാലെ ആരോഗ്യപ്രശ്‌നങ്ങൾ ഉൾപ്പെടെ ചൂണ്ടിക്കാട്ടി ബൈഡൻ, മത്സരത്തിൽ നിന്ന് പിന്മാറണമെന്ന ആവശ്യം പാർട്ടിക്കുള്ളിൽ നിന്ന് തന്നെ ശക്തമായിരുന്നു.