അമ്പെയ്‌ത്തിലും നീന്തലിലും കണ്ണീർ; സുമിത് നാ​ഗലും ശരത് കമലും വീണു; മണിക ബത്ര മുന്നോട്ട്

പാരിസ് ഒളിമ്പിക്സിൽ ആർച്ചറിയിലും ടെന്നീസിലും ഇന്ന് ഇന്ത്യക്ക് നിരാശയുടെ ദിവസം. ടേബിൾ ടെന്നീസിൽ പ്രതീക്ഷയും ദുഃഖവും സമ്മാനിച്ച ദിവസമാണ് കടന്നുപോകുന്നത്. മെഡൽ പ്രതീക്ഷയായിരുന്നു ശരത് കമൽ സിം​ഗിൾസിൽ പുറത്തായി. സ്ലൊവേനിയൻ താരത്തോടാണ് ഇന്ത്യൻ ഇതിഹാസ താരം കീഴടങ്ങിയത്. അമ്പെയ്‌ത്തിൽ നെതർലൻഡിനോട് തോറ്റ് ക്വാർട്ടറിൽ പുറത്താവുകയായിരുന്നു ഇന്ത്യൻ വനിത ടീം. അങ്കിത ഭകത്, ഭജൻ കൗർ, ദീപിക കുമാരി എന്നിവരടങ്ങുന്ന ടീം 0-6 എന്ന സ്കോറിനാണ് പരാജയം സമ്മതിച്ചത്.

ആറ് സെറ്റ് നീണ്ട പോരാട്ടത്തിൽ ഡെനി കൗസലിനോട് (12-10,9-11,6-11,7-11,11-8,10-12) എന്ന സ്കോറിനാണ് പരാജയം രുചിച്ചത്. എന്നാൽ വനിത സിം​ഗിൾസിൽ മണിക ബത്ര അവസാന 32 ലേക്ക് മുന്നേറിയത് പ്രതീക്ഷയായി. ബ്രിട്ടന്റെ അന്ന ഹർസയെ ആണ് മണിക വീഴ്‌ത്തിയത്. 11-8,12-10,11-9,9-11,11-5 എന്ന സ്കോറിനായിരുന്നു ഇന്ത്യൻ താരത്തിന്റെ വിജയം.

നീന്തലിലും നിരാശ സമ്മാനിച്ച ദിവസമായിരുന്നു ഇന്ന്. ദിനിധി ദേസിങ്കു വനിതകളുടെ 200 മീറ്റ‍ർ ഫ്രീ സ്റ്റൈലിൽ അവസാന 16-ൽ എത്താനാകാതെ പുറത്തായി. 23-ാം സ്ഥാനത്താണ് ഫിനിഷ് ചെയ്യാനായത്. പുരുഷന്മാരുടെ 100 മീറ്റർ ബാക്സ്ട്രോക് ഹീറ്റ്സിൽ ശ്രീഹരി നടരാജനും സെമി കാണാതെ പുറത്തായി. ടെന്നീസിൽ സുമിത് നാ​ഗലും ആദ്യ റൗണ്ടിൽ പുറത്തായത് ഇന്ത്യക്ക് തിരിച്ചടിയായി. ഫ്രാൻസ് താരത്തോട് 2-6,6-2,5-7 എന്ന സ്കോറിനാണ് തോൽവി വഴങ്ങിയത്.