ദുബായ്; മെട്രോ പുതിയ സർവീസ് ആരംഭിച്ചു. ദുബായ് മെട്രോയിലെ റെഡ് ലൈൻ സ്റ്റേഷനുകളായ എക്‌സ്‌പോ 2020, യുഎഇ എക്‌സ്‌ചേഞ്ച് മെട്രോ സ്റ്റേഷനുകളിലേക്ക് നേരിട്ടുള്ള സർവീസുകൾക്കാണ് തുടക്കമായത്. ഇതോടെ സെൻട്രൽ പോയിന്റിൽ നിന്ന് യുഎഇ എക്‌സ്‌ചേഞ്ചിലേക്കും തിരിച്ചും യാത്ര ചെയ്യുന്നവർക്ക് ഇനി ജബൽ അലി സ്റ്റേഷനിൽ ഇറങ്ങി ലൈൻ മാറി കേറേണ്ട ആവശ്യമില്ല.
ജബൽ അലിയിൽ വൈ ജംഗ്ഷൻ സ്ഥാപിച്ചതോടെ എക്‌സ്‌പോയിലേക്കും യുഎഇ എക്‌സ്‌ചേഞ്ചിലേക്കും നേരിട്ടുള്ള സർവീസുകൾ സാധ്യമായി. സെന്റർ പോയിന്റ് സ്റ്റേഷനിൽ നിന്ന് ഒരാൾ യുഎഇ എക്‌സ്‌ചേഞ്ചിലേക്കു കയറിയാൽ അവർ ജബൽ അലിയിലെ ഇന്റർ ചേഞ്ച് സ്റ്റേഷനിൽ ഇറങ്ങി ട്രെയിൻ മാറിക്കയറണമായിരുന്നു. തിരിച്ചു സെന്റർ പോയിന്റിലേക്കുള്ള യാത്രയിലും ഇതേ സാഹചര്യമായിരുന്നു.
യാത്രക്കാർ ഡിസ്‌പ്ലേ സ്‌ക്രീനുകൾ പരിശോധിച്ച് ട്രെയിൻ ആണെന്ന് ഉറപ്പുവരുത്തി വേണം യാത്ര ചെയ്യാനെന്നും ദുബായ് റോഡ് ആൻഡ് ട്രാൻസ്‌പോർട്ട് അതോറിറ്റി അറിയിച്ചു. വരും വർഷങ്ങളിൽ കൂടുതൽ മെട്രോ സ്റ്റേഷനുകൾ തുടങ്ങുമെന്ന് കഴിഞ്ഞ ജൂണിൽ ദുബായ് എക്‌സിക്യൂട്ടിവ് കൗൺസിൽ പ്രഖ്യാപിച്ചിരുന്നു.
2030 ഓടെ നിലവിലെ 64 സ്റ്റേഷനുകൾ 96 ആക്കി ഉയർത്തുകയാണ് ലക്ഷ്യം. 2040 ആകുമ്പോഴേക്ക് 224 ചതുരശ്ര കിലോമീറ്ററിലായി 140 സ്റ്റേഷനുകൾ തുടങ്ങും. പൊതുഗതാഗതം ഉപയോഗിക്കുന്നവരുടെ എണ്ണം 45 ശതമാനമായി വർധിപ്പിക്കുകയാണ് മെട്രോ വിപുലീകരിക്കുന്നതിലൂടെ ആർടിഎ ലക്ഷ്യമിടുന്നത്.
