തിരുവനന്തപുരം: കേരള ക്രിക്കറ്റ് അസോസിയേഷൻ സംഘടിപ്പിക്കുന്ന പ്രഥമ കേരള ക്രിക്കറ്റ് ലീഗിലെ ടീമുകളുടെ പേരുകളും ജില്ലകളും ഐക്കണ്‍ താരങ്ങളെയും പ്രഖ്യാപിച്ചു. തിരുവനന്തപുരവും എറണാകുളവുമടക്കം ആറ് ജില്ലകൾക്കാണ് ടീമുകളുള്ളത്.
സംവിധായകന്‍ പ്രിയദര്‍ശനും ജോസ് തോമസ് പട്ടാറയും ചേര്‍ന്നുള്ള കണ്‍സോര്‍ഷ്യം വാങ്ങിയ തിരുവനന്തപുരം ടീമിന്റെ പേര് ട്രിവാന്‍ഡ്രം റോയല്‍സ് എന്നാണ്. ഏരീസ് ഗ്രൂപ്പ് സ്വന്തമാക്കിയ കൊല്ലം ജില്ലയുടെ ഫ്രാഞ്ചൈസിക്ക് ഏരീസ് കൊല്ലം സെയ്‌ലേഴ്സ് എന്നാണ് പേര്. നിര്‍മാതാവും സംവിധായകനുമായ സോഹന്‍ റോയിയാണ് ഉടമ.
ഇകെകെ ഇന്‍ഫ്രാസ്ട്രെക്ചര്‍ ലിമിറ്റഡ് സ്വന്തമാക്കിയ കോഴിക്കോട് ടീമിന് കാലിക്കട്ട് ഗ്ലോബ്സ്റ്റാഴ്സ് എന്നും കണ്‍സോള്‍ ഷിപ്പിംഗ് സര്‍വീസസ് ഇന്ത്യ പ്രൈവറ്റ് ലിമിറ്റഡ് സ്വന്തമാക്കിയ ആലപ്പുഴ ടീമിന് ആലപ്പി റിപ്പിള്‍സ് എന്നും പേരിട്ടു.
എനിഗ്മാറ്റിക് സ്മൈല്‍ റിവാര്‍ഡ്സ് സ്വന്തമാക്കിയ എറണാകുളം ടീമിന്റെ പേര് കൊച്ചി ബ്ലൂ ടൈഗേഴ്സ്,തൃശൂര്‍ ടൈറ്റന്‍സിനെ സ്വന്തമാക്കിയത് ഫൈനസ് മാര്‍ക്കറ്റ് ലിങ്ക് പ്രൈവറ്റ് ലിമിറ്റഡ് ആണ്. ഫ്രാഞ്ചൈസി മീറ്റംഗിലാണ് പേരുകളും ഐക്കൺ താരങ്ങളെ സംബന്ധിച്ചും തീരുമാനമായത്.
ലേലത്തിൽ ലേലത്തില്‍ പങ്കെടുക്കാനുള്ള രജിസ്റ്റ‍ർ ചെയ്ത കളിക്കാരെ കെ.സി.എ തീരുമാനിക്കും.ഓഗസ്റ്റ് 10 ന് തിരുവനന്തപുരം ഹയാത്ത് റീജന്‍സിയിലാണ് കളിക്കാരുടെ ലേലം നടക്കുക. സെപ്റ്റംബര്‍ രണ്ടു മുതല്‍ 19 വരെ തിരുവനന്തപുരം ഗ്രീൻഫീൽഡിലാണ് മത്സരങ്ങൾ.
പി.എ. അബ്ദുള്‍ ബാസിത് ട്രിവാന്‍ഡ്രം റോയല്‍സിന്‍റെയും സച്ചിന്‍ ബേബി ഏരീസ് കൊല്ലം സെയ്‌ലേഴ്സിന്‍റെയും രോഹന്‍ എസ് കുന്നമ്മല്‍ കാലിക്കട്ട് ഗ്ലോബ്സ്റ്റാഴ്സിന്റെയും മുഹമ്മദ് അസറുദ്ദീന്‍ ആലപ്പി റിപ്പിള്‍സിന്‍റെയും ബേസില്‍ തമ്പി കൊച്ചി ബ്ലൂ ടൈഗേഴ്സിന്റെയും വിഷ്ണു വിനോദ് തൃശ്ശൂര്‍ ടൈറ്റന്‍സിന്‍റെയും ഐക്കൺ താരങ്ങളാകും.
