ദുബായ്: കടുത്ത ചൂടിലും ലക്ഷ്യസ്ഥാനത്തേക്ക് കുതിക്കുന്ന ബൈക്ക് ഡെലിവറി തൊഴിലാളികൾക്കായി കൂടുതൽ വിശ്രമകേന്ദ്രങ്ങളൊരുക്കി ദുബായ് റോഡ്സ് ആന്റ് ട്രാൻസ്പോർട്ട് അതോറിറ്റി. അത്യാധുനിക സജ്ജീകരണങ്ങളുള്ള നാൽപത് കേന്ദ്രങ്ങളാണ് നിർമ്മിക്കാൻ ലക്ഷ്യമിടുന്നത്. ഇവയിൽ ഇരുപത് എണ്ണത്തിന്റെ നിർമ്മാണം പൂർത്തിയായി.
അസഹനീയമായ ചൂടിൽനിന്ന് ബൈക്ക് ഡെലിവറി ജീവനക്കാർക്കാരെ സംരക്ഷിക്കുകയാണ് 20 വിശ്രമ കേന്ദ്രങ്ങൾ തുറക്കുന്നതിലൂടെ ആർ.ടി.എ ലക്ഷ്യമിടുന്നത്. തൊഴിലാളികളുടെ ആരോഗ്യവും സുരക്ഷയും ഉറപ്പുവരുത്തുന്നതിനും അവർക്ക് സുരക്ഷിതമായ തൊഴിൽ അന്തരീക്ഷം പ്രദാനം ചെയ്യുന്നതിനുമുള്ള ശ്രമങ്ങളുടെ ഭാഗമായാണ് പദ്ധതി നടപ്പിലാക്കുന്നത്. ഹെസ്സ സ്ട്രീറ്റ്, അൽ ബർഷ, അൽ ബർഷ ഹൈറ്റ്സ്, കരാമ, അൽ ബുത്തീൻ, ഉമ്മു സുഖീം എന്നിവയുൾപ്പെടെയുളള സ്ഥലങ്ങളിലാണ് വിശ്രമകേന്ദ്രങ്ങൾ ഒരുക്കുന്നത്.
ഓരോ കേന്ദ്രത്തിലും പത്തിലധികം പേർക്കുള്ള ഇടം, കുടിവെള്ളം, ലഘു ഭക്ഷണം കിട്ടുന്ന വെൻഡിങ്ങ് മെഷീൻ, മൊബൈൽ ഫോൺ ചാർജിങ്ങ് സ്റ്റേഷൻ എന്നിവ ഉണ്ടാകും. മോട്ടോർ സൈക്കിളുകൾ പാർക്ക് ചെയ്യാനുള്ള സൗകര്യവുമുണ്ട്. ഡെലിവറി ജോലി ചെയ്യുന്നവർക്ക് സുരക്ഷിതമായി തൊഴിലെടുക്കാനുളള അന്തരീക്ഷം സൃഷ്ടിക്കുന്നതിനും അവർക്ക് ആവശ്യമായ വിശ്രമം ഉറപ്പുവരുത്തുന്നതിനുമാണ് ഇത്തരം നടപടികളെന്നും ആർടിഎ ചെയർമാൻ മത്തർ അൽ തായർ വ്യക്തമാക്കി .
