കീവ് : മംഗോളിയയിലേക്ക് സന്ദർശനം നടത്താനിരിക്കുന്ന റഷ്യൻ പ്രസിഡൻ്റ് വ്‌ളാഡിമിർ പുടിനെ അറസ്റ്റ് ചെയ്യണമെന്ന് ആ രാജ്യത്തോട് ആവശ്യപ്പെട്ട് യുക്രെയ്ൻ.
യുദ്ധക്കുറ്റങ്ങൾക്ക് ഉത്തരവാദി പുടിനാണെന്ന് ആരോപിച്ച് കോടതി അന്താരാഷ്‌ട്ര ക്രിമിനൽ കോടതി (ഐസിസി) പുടിനെതിരെ അറസ്റ്റ് വാറന്റ് പുറപ്പെടുവിച്ചിട്ടുണ്ട്. അറസ്റ്റിന് വാറണ്ട് പുറപ്പെടുവിച്ചതിന് ശേഷം അദ്ദേഹം ആദ്യമായി ഒരു ഐസിസി അംഗരാജ്യത്തിലേക്ക് പോകുകയാണ്. സംഘർഷം ആരംഭിച്ചതിന് ശേഷം യുക്രൈനിൽ നിന്ന് റഷ്യയിലേക്ക് കുട്ടികളെ നിയമവിരുദ്ധമായി നാടുകടത്തുന്നത് തടയുന്നതിൽ അദ്ദേഹം പരാജയപ്പെട്ടു എന്നാരോപിച്ചാണ് അറസ്റ്റ് വാറന്റ് പുറപ്പെടുവിച്ചത്.ഐസിസി നിയന്ത്രണങ്ങൾ പാലിക്കാൻ മംഗോളിയൻ ഉദ്യോഗസ്ഥർക്ക് ബാധ്യതയുണ്ടെന്ന് ഒരു ഐസിസി വക്താവ് മാധ്യമങ്ങളോട് പറഞ്ഞു. എന്നാൽ ഇത് കൊണ്ട് അറസ്റ്റ് നടക്കണമെന്ന് അർത്ഥമാക്കുന്നില്ലന്നത് വ്യക്തമാണ്.
പുടിന്റെ മംഗോളിയ സന്ദർശനത്തെക്കുറിച്ച് ഞങ്ങൾക്ക് ആശങ്കയില്ലെന്ന് ക്രെംലിൻ അധികൃതർ പറഞ്ഞു. ഐസിസി അംഗമായ ആദ്യ രാജ്യമാണ് മംഗോളിയ. ഡിസംബർ മൂന്നിന് പുടിൻ മംഗോളിയ സന്ദർശിക്കുമെന്നാണ് റിപ്പോർട്ടുകൾ.
2023 മാർച്ചിൽ ഐസിസി അറസ്റ്റ് വാറണ്ട് പുറപ്പെടുവിച്ച ശേഷം ഏതെങ്കിലും ഐസിസി അംഗരാജ്യത്തിലേക്കുള്ള പുടിന്റെ ആദ്യ സന്ദർശനമാണിത്. ഈ കോടതി നിലവിൽ വന്ന ഉടമ്പടിയുടെ ‘റോം നിയമം’ അനുസരിച്ച്, ഒരാൾക്കെതിരെ അറസ്റ്റ് വാറണ്ട് പുറപ്പെടുവിക്കുകയും ആ വ്യക്തി ഒരു ഐസിസി അംഗരാജ്യത്ത് കാലുകുത്തുകയും ചെയ്താൽ, അവനെ അറസ്റ്റുചെയ്യാനുള്ള ഉത്തരവാദിത്തം ആ രാജ്യത്തിനാണ്. ഇതല്ലാതെ ഉത്തരവുകൾ നടപ്പാക്കാൻ കോടതിക്ക് യാതൊരു സംവിധാനവുമില്ല.
ജാപ്പനീസ് സൈനികർക്കെതിരായ സോവിയറ്റ്, മംഗോളിയൻ സായുധ സേനയുടെ സംയുക്ത വിജയത്തിന്റെ 85-ാം വാർഷികം ആഘോഷിക്കുമ്പോൾ പങ്കെടുക്കാനാണ് മംഗോളിയൻ പ്രസിഡൻ്റ് ഉഖ്‌ന ഖുറെൽസുഖ് വ്‌ളാഡിമിർ പുടിനെ ക്ഷണിച്ചത്. പുടിന്റെ മംഗോളിയയിലേക്കുള്ള യാത്രയിൽ ക്രെംലിൻ ആശങ്കപ്പെടുന്നില്ലെന്ന് പുടിന്റെ വക്താവ് ദിമിത്രി പെസ്കോവ് പറഞ്ഞു.
ഐസിസി അറസ്റ്റ് വാറണ്ടിനെ തുടർന്ന് കഴിഞ്ഞ വർഷം, ദക്ഷിണാഫ്രിക്കയിൽ നടന്ന ഉച്ചകോടി സന്ദർശനം പുടിൻ റദ്ദാക്കിയിരുന്നു.
