തിരുവനന്തപുരം: സംസ്ഥാനത്ത് ബിജെപിയുടെ മെമ്പർഷിപ്പ് കാമ്പയിൻ ആരംഭിച്ചു. സംസ്ഥാന അദ്ധ്യക്ഷൻ കെ.സുരേന്ദ്രൻ തിരുവനന്തപുരത്ത് കാമ്പയിൻ ഉദ്ഘാടനം ചെയ്തു. ഒക്ടോബർ 10 വരെ നീണ്ടുനിൽക്കുന്ന മെമ്പർഷിപ്പ് ഡ്രൈവിൽ കേരളത്തിൽ 50 ലക്ഷത്തോളം പേരെ അംഗങ്ങളാക്കാനാണ് ബിജെപി ലക്ഷ്യമിടുന്നത്.
പിണറായി വിജയന്റെ കാലത്തോടെ സി.പി.എം അസ്തമിക്കുമെന്ന് മെമ്പർഷിപ്പ് ക്യാമ്പയിൻ ഉദ്ഘാടനം ചെയ്ത് കെ സുരേന്ദ്രൻ പറഞ്ഞു. കേരളത്തിൽ ഇനി ബിജെപിയുടെ യുഗമാണ്. കേന്ദ്രത്തിലെ പത്ത് വർഷത്തെ ബിജെപി ഭരണം കൊണ്ട് കേരളത്തിന് വലിയ നേട്ടമാണുണ്ടായത്. ദേശീയ തലത്തിൽ നിലവിലുള്ള 21 കോടി അംഗങ്ങളേക്കാൾ 10 കോടി പുതിയ അംഗങ്ങളെ ചേർക്കാനാണ് ബിജെപി ലക്ഷ്യം വച്ചിരിക്കുന്നത്.
ഭാരതീയ വിചാര കേന്ദ്രം ഓഡിറ്റോറിയത്തിൽ നടന്ന ഔദ്യോഗിക മെമ്പർഷിപ്പ് ക്യാമ്പയിൻ ചടങ്ങ് മുൻ കേന്ദ്രമന്ത്രി വി.മുരളീധരൻ ഉദ്ഘാടനം ചെയ്തു. സാമൂഹ്യ-സാംസ്‌കാരിക രംഗത്തെ നിരവധി പേർ ചടങ്ങിൽ ബിജെപി മെമ്പർഷിപ്പ് സ്വീകരിച്ചു. സംസ്ഥാന അദ്ധ്യക്ഷൻ കെ.സുരേന്ദ്രൻ അദ്ധ്യക്ഷത വഹിച്ചു.
സംസ്ഥാന ജനറൽസെക്രട്ടറി പി.സുധീർ, സംസ്ഥാന ഉപാദ്ധ്യക്ഷൻമാരായ സി.ശിവൻകുട്ടി, വിടി രമ, സംസ്ഥാന സെക്രട്ടറിമാരായ എസ്.സുരേഷ്, കരമന ജയൻ, ജെ.ആർ പദ്മകുമാർ, ജില്ലാ പ്രഭാരി അശോകൻ കുളനട, ജില്ലാ പ്രസിഡന്റ് വിവി രാജേഷ്, ന്യൂനപക്ഷ മോർച്ച ദേശീയ ഉപാദ്ധ്യക്ഷൻ ഡോ.അബ്ദുൾ സലാം എന്നിവർ സംബന്ധിച്ചു.
സംസ്ഥാനത്തെ എല്ലാ ബൂത്തുകളിലും അംഗത്വ വിതരണം ആരംഭിച്ചു. കൂടുതൽ ജനവിഭാഗങ്ങളെ കൂടെ ചേർക്കാനുള്ള പ്രവർത്തനങ്ങളാണ് ഈ മെമ്പർഷിപ്പ് ഡ്രൈവിലൂടെ പാർട്ടി ലക്ഷ്യമിടുന്നത്.
