തിരുവനന്തപുരം: വീട്ടിൽ കഞ്ചാവ് ചെടികൾ കൃഷി ചെയ്ത് വിളവെടുത്ത് കച്ചവടം ചെയ്തയാളെ എക്സൈസ് സംഘം പിടികൂടി. പാറശാല സ്വദേശി ശങ്കറാ (54) ണ് വീടിന് സമീപത്ത് രണ്ട് കഞ്ചാവ് ചെടികൾ നട്ടുവളത്തിയത്. ഇയാളുടെ പക്കൽ നിന്നും വിൽക്കാനായി ഉണക്കി സൂക്ഷിച്ച 150 ഗ്രാം കഞ്ചാവും 3 മീറ്റർ നീളമുള്ള രണ്ട് കഞ്ചാവ് ചെടികളും എക്സൈസ് സംഘം പിടിച്ചെടുത്തു.
എക്സൈസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. വളർത്തിയ കഞ്ചാവ് ചെടികളുടെ ഭാഗങ്ങൾ വെട്ടിയെടുത്ത് ഉണക്കി ഇയാൾ വില്പന നടത്തിയിരുന്നതായും എക്സൈസ് ഉദ്യോഗസ്ഥർ പറഞ്ഞു.അമരവിള എക്സൈസ് റേഞ്ച് ഇൻസ്പെക്ടർ വി എൻ മഹേഷിന്റെ നേതൃത്വത്തിൽ നടത്തിയ പരിശോധനയിലാണ് കഞ്ചാവ് ചെടികൾ കണ്ടെത്തിയത്.
അസിസ്റ്റന്റ് എക്സൈസ് ഇൻസ്പെക്ടർമാരായ ജസ്റ്റിൻ രാജ്, ഗോപകുമാർ, പ്രിവന്റീവ് ഓഫീസർ വിപിൻ സാം, വനിതാ സിവിൽ എക്സൈസ് ഓഫീസർ ലിജിത, സിവിൽ എക്സൈസ് ഓഫീസർമാരായ അഖിൽ വി എ , ലിന്റോ രാജ്, അനീഷ് വി ജെ, ഡ്രൈവർ സുരേഷ്കുമാർ എന്നിവരും സംഘത്തിലുണ്ടായിരുന്നു.
