പാലക്കാട്: കൽപ്പാത്തി രഥോത്സവത്തിന്റെ പശ്ചാത്തലത്തിൽ പാലക്കാട് മണ്ഡലത്തിലെ ഉപതെരഞ്ഞെടുപ്പ് മാറ്റിവയ്ക്കണമെന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ. ഇക്കാര്യം ചൂണ്ടിക്കാട്ടി മുഖ്യ തെരഞ്ഞെടുപ്പ് കമ്മീഷണർ രാജീവ് കുമാറിന് കെ സുരേന്ദ്രൻ കത്ത് നൽകി.
മതപരവും സാംസ്‌കാരികവുമായും പ്രാധാന്യമുളളതാണ് കൽപ്പാത്തി രഥോത്സവമെന്ന് കെ സുരേന്ദ്രൻ കത്തിൽ ചൂണ്ടിക്കാട്ടി. കാൽലക്ഷത്തിലധികം വിശ്വാസികൾ പങ്കെടുക്കുന്ന പരിപാടിയാണിത്. രഥോത്സവത്തിന്റെ തുടക്കദിനമായ അന്ന് തെരഞ്ഞെടുപ്പ് നടത്തിയാൽ ഈ മേഖലയിലെ വോട്ടർമാർക്ക് വോട്ട് ചെയ്യാനാകില്ലെന്നും കൽപ്പാത്തി രഥോത്സവത്തിന്റെ സാംസ്‌കാരികവും മതപരവുമായ പ്രാധാന്യം കണക്കിലെടുത്ത് ഇക്കാര്യത്തിൽ പുനപരിശോധന നടത്തണമെന്നുമാണ് കത്തിൽ ആവശ്യപ്പെട്ടിരിക്കുന്നത്.
വോട്ടെടുപ്പ് നവംബർ 20 ലേക്ക് പുനക്രമീകരിച്ചാൽ വിശ്വാസികൾക്ക് മറ്റ് തടസമില്ലാതെ ജനാധിപത്യത്തിന്റെ ഉത്സവത്തിലും പങ്കെടുക്കാമെന്നും മണ്ഡലത്തിലെ പോളിംഗ് ശതമാനം വർദ്ധിപ്പിക്കാനും ഇത് സഹായിക്കുമെന്നും കെ സുരേന്ദ്രൻ ചൂണ്ടിക്കാട്ടി. രഥോത്സവ ദിവസം തെരഞ്ഞെടുപ്പ് നടത്തരുതെന്ന് കൽപ്പാത്തിയിലെ വിവിധ ക്ഷേത്രങ്ങളും കേന്ദ്ര തെരഞ്ഞെടുപ്പ് കമ്മീഷന് കത്ത് നൽകിയിട്ടുണ്ട്.
വൈകിട്ടാണ് തെരഞ്ഞെടുപ്പ് കമ്മീഷൻ പാലക്കാട്, ചേലക്കര നിയമസഭാ മണ്ഡലങ്ങളിലെയും വയനാട് പാർലമെന്റ് മണ്ഡലത്തിലെയും ഉപതെരഞ്ഞെടുപ്പ് തീയതി പ്രഖ്യാപിച്ചത്. 23 ന് വോട്ടെണ്ണി ഫലം പ്രഖ്യാപിക്കും.
