ന്യൂഡൽഹി: ദീപാവലി ആശംസകൾ നേർന്ന് പ്രധാനമന്ത്രി നരേന്ദ്ര മോദി. ഭാരത്തിലെ പൗരന്മാർക്ക് സന്തോഷവും ആരോഗ്യവും സമൃദ്ധിയും ഉണ്ടാവട്ടെയെന്ന് പ്രധാനമന്ത്രി എക്സിൽ കുറിച്ചു. ലക്ഷ്മീദേവിയുടെയും ഗണപതിയുടെയും അനുഗ്രഹത്താൽ എല്ലാവർക്കും ഐശ്വര്യമുണ്ടാകട്ടെയെന്നും അദ്ദേഹം പറഞ്ഞു.
രാമക്ഷേത്രം യാഥാർത്ഥ്യമായതിന് ശേഷമുള്ള ആദ്യ ദീപാവലിയാണ് ഇത്തവണത്തേതെന്നും അയോദ്ധ്യയിലെ ദീപോത്സവം ഗിന്നസിൽ ഇടം നേടിയതിനെ കുറിച്ചും പ്രധാനമന്ത്രി പരാമർശിച്ചു. 500 വർഷങ്ങൾക്ക് ശേഷം ഏറെ ത്യാഗങ്ങൾക്ക് ശേഷമാണ് ഈ പുണ്യ നിമിഷം ആഗതമായത്. രാമഭക്തരുടെ തപസ്സും ഈ ചരിത്ര മുഹൂർത്തത്തിന്റെ സാക്ഷികളാകാൻ കഴിഞ്ഞത് നമ്മുടെ ഭാഗ്യമാണെന്നും പ്രധാനമന്ത്രി പറഞ്ഞു. രണ്ട് റെക്കോർഡുകളാണ് അയോദ്ധ്യ സ്വന്തമാക്കിയത്. ഏറ്റവുമധികം ദീപങ്ങൾ (25 ലക്ഷം) തെളിയിച്ചതാണ് ആദ്യ റെക്കോർഡ്. ഏറ്റവുമധികം വേദാചാര്യന്മാർ (1,121) ഒരേസമയം സരയൂ ആരതി നടത്തിയെന്നതാണ് രണ്ടാമത്തേത്.
