പാലക്കാട് ഉപതെരഞ്ഞെടുപ്പിൽ കേരളാ ചെട്ടി മഹാസഭയുടെ പിന്തുണ എൻഡിഎയ്ക്ക്. പാലക്കാട് തിരുനെല്ലായിൽ ചേർന്ന ജില്ലാ പൊതുയോഗമാണ് ഐകകണ്ഠ്യേന എൻഡിഎയ്ക്ക് പിന്തുണ നൽകാൻ തീരുമാനിച്ചത്. കേരള ചെട്ടി സമുദായം നേരിടുന്ന പ്രശ്നങ്ങൾ പരിഹരിക്കാൻ എക്കാലത്തും ബിജെപിയും സി. കൃഷ്ണകുമാറും ഒപ്പം നിന്നിട്ടുണ്ടെന്നും സമുദായത്തെ OBC പട്ടികയിൽ ഉൾപ്പെടുത്തുന്നതടക്കമുള്ള വിഷയങ്ങൾ അനുഭാവ പൂർവ്വം പരിഗണിക്കാമെന്ന് എൻഡിഎ അറിയിച്ചതായും സംഘടനാ നേതാക്കൾ അറിയിച്ചു.
തെരഞ്ഞെടുപ്പ് ആവേശം വാനോളമുയർത്തി എൻഡിഎയുടെ കൂറ്റൻ ബൈക്ക് റാലി ഞായറാഴ്ച വൈകിട്ട് നടന്നു.
പിരായിരി പഞ്ചായത്തിലെ കൊടുന്തിരിപ്പിള്ളിയിൽ നിന്നാണ് നൂറുകണക്കിന് ഇരുചക്ര വാഹനങ്ങൾ അണിനിരന്ന ബൈക്ക് റാലി ആരംഭിച്ചത്.
റാലി കല്ലേക്കാട്, മില്ല് സ്റ്റോപ്പ്, കുറിശ്ശാങ്കുളം, മേൽ പറമ്പ് വഴി കണ്ണാടി പഞ്ചായത്തിലേക്ക് എത്തി.
തുടർന്ന് കണ്ണന്നൂർ, വടക്ക് മുറി, കിണാശ്ശേരി വഴി നീങ്ങി. പിരായിരി, കണ്ണാടി, മാത്തൂർ പഞ്ചായത്തുകളിൽ നിന്നുള്ള പ്രവർത്തകരാണ് റോഡ് ഷോയിൽ അണിനിരന്നത്.
