കോഴിക്കോട്: കൊയിലാണ്ടിയിൽ പൊലീസുകാർക്ക് നേരെ ലഹരി മാഫിയയുടെ ആക്രമണം. കഞ്ചാവ് വില്പനക്കാരെ തിരഞ്ഞുപോയ പൊലീസിന് നേരെയാണ് ആക്രമണമുണ്ടായത്. ആക്രമണത്തിൽ നാല്‌ പൊലീസുകാർക്ക് പരിക്കേറ്റു.
പഴയചിത്ര ടാക്കീസിന് സമീപത്തുവച്ചാണ് ആക്രമണമുണ്ടായത്. ഇവിടെ കഞ്ചാവ് വില്പന വ്യാപകമാണെന്ന രഹസ്യവിവരത്തിന്റെ അടിസ്ഥാനത്തിലാണ് പൊലീസ് പരിശോധനയ്‌ക്കെത്തിയത്. എന്നാൽ പ്രദേശത്തുണ്ടായിരുന്ന കഞ്ചാവ് വില്പന സംഘം പൊലീസിനെ കടന്നാക്രമിക്കുകയായിരുന്നു. ലഹരി മാഫിയ ആസൂത്രണം ചെയ്ത് നടപ്പിലാക്കിയ ആക്രമണമാണിതെന്നാണ് പൊലീസ് സംശയിക്കുന്നത്.
സംഭവത്തിൽ പ്രതി മേലൂർ സ്വദേശി രോഹിത്തിന്റെ കൊയിലാണ്ടി പൊലീസ് അറസ്റ്റ് ചെയ്തു. എസ്ഐ ജിതേഷ്, ഗ്രേഡ് എസ്ഐ അബ്ദുള്ള, സീനിയർ സിവിൽ പൊലീസ് ഓഫീസർമാരായ പ്രവീൺ കുമാർ, സിനു രാജ് എന്നിവർക്കാണ് പരിക്കേറ്റത്. ഇവരെ കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചു.
