കൊച്ചി: ശബരിമല സന്നിധാനത്ത് അനുഭവസമ്പത്തുള്ള പൊലീസ് ഉദ്യോഗസ്ഥർ വേണമെന്ന് ഹൈക്കോടതി. ഈ മാസം 30ന് പുതിയ ബാച്ച് പൊലീസ് ഉദ്യോഗസ്ഥർ ചുമതല ഏൽക്കുമ്പോഴും ഇക്കാര്യം ശ്രദ്ധിക്കണമെന്നും കോടതി സർക്കാരിനോട് നിർദ്ദേശിച്ചു. പ്രായമായവർ, കുട്ടികൾ, ശാരീരിക ബുദ്ധിമുട്ടുള്ളവർ എന്നിവരെ ദർശനം നടത്തുന്നതിന് സഹായിക്കാൻ അനുഭവസമ്പത്തുള്ള പോലീസ് ഉദ്യോഗസ്ഥരുടെ സേവനം അനിവാര്യമാണെന്ന് കോടതി ചൂണ്ടിക്കാട്ടി.
വെർച്ച്വൽ ക്യൂ ബുക്ക് ചെയ്തവർ ദർശനത്തിന് വരുന്നില്ലെങ്കിൽ ബുക്കിംഗ് ക്യാൻസൽ ചെയ്യണമെന്നും കോടതി നിർദ്ദേശിച്ചു. മാദ്ധ്യമങ്ങളിലൂടെ അടക്കം ഇക്കാര്യം അറിയിക്കണം. വെർച്വൽ ക്യൂ വഴി ബുക്ക് ചെയ്യുന്ന ഭക്തരിൽ 20 മുതൽ 25 ശതമാനം വരെ എത്താറില്ലെന്ന് ദേവസ്വം ബോർഡ് കോടതിയെ അറിയിച്ചിരുന്നു.
77026 തീർത്ഥാടകരാണ് കഴിഞ്ഞ ദിവസം ദർശനം നടത്തിയത്. നിലക്കൽ – പമ്പ റൂട്ടിൽ 122 കെഎസ്ആർടിസി ബസുകൾ ചെയിൻ സർവീസ് നടത്തി. സീതത്തോട് നിലയ്‌ക്കൽ കുടിവെള്ള പദ്ധതിയുടെ പൈപ്പിടൽ ഒരാഴ്ചയ്‌ക്കകം പൂർത്തിയാക്കുമെന്ന് വാട്ടർ അതോറിറ്റി അറിയിച്ചു. കാര്യങ്ങൾ പൂർണമായും നിയന്ത്രണവിധേയമെന്നാണ് ദേവസ്വം ബോർഡ് കോടതിയെ അറിയിച്ചിരിക്കുന്നത്.
