ന്യൂഡൽഹി: സയ്യിദ് മോദി ഇൻ്റർനാഷണൽ 2024 കിരീടം നേടി ഇന്ത്യയുടെ പിവി സിന്ധു. രണ്ട്‌ വർഷത്തെ കിരീട വരൾച്ചയ്‌ക്കൊടുവിലാണ് നേട്ടം. രണ്ട്‌ തവണ ഒളിമ്പിക് ജേതാവായ സിന്ധു ഫൈനലിൽ ചൈനയുടെ ലുവോ യു വുവിനെ നേരിട്ടുള്ള ഗെയിമുകൾക്കാണ് (21-14, 21-16) പരാജയപ്പെടുത്തിയത്. ജയത്തോടെ സിന്ധു തന്റെ മൂന്നാം സയ്യിദ് മോദി ഇൻ്റർനാഷണൽ കിരീടം സ്വന്തമാക്കി.
ജയത്തോടെ സിന്ധു തന്റെ മൂന്നാം സയ്യിദ് മോദി ഇൻ്റർനാഷണൽ കിരീടം സ്വന്തമാക്കി. മത്സരത്തിന്റെ തുടക്കം മുതൽ ആധിപത്യം പുലർത്തിയ സിന്ധു, ആദ്യ ഗെയിം 21-14 എന്ന മാർജിനിൽ അനായാസം ജയിച്ചു. രണ്ടാം ഗെയിമിൽ ഒരുവേള യു വു സമനില പിടിച്ചെങ്കിലും ജയം സിന്ധുവിനൊപ്പമായിരുന്നു. 2022 ജൂലൈയിൽ നേടിയ സിംഗപ്പൂർ ഓപ്പണിന് ശേഷമുള്ള സിന്ധുവിന്റെ ആദ്യ കിരീടമാണിത്.
2024 ൽ 14 ടൂർണമെന്റുകളിൽ കളിച്ച സിന്ധു രണ്ടാം തവണ മാത്രമാണ് ഫൈനൽ കളിച്ചത്. പാരിസ് ഒളിമ്പിക്സിൽ പ്രീക്വാർട്ടറിൽ സിന്ധു പുറത്തായിരുന്നു. മലേഷ്യ മാസ്റ്റേഴ്‌സിന്റെ ഫൈനലിൽ ചൈനയുടെ ഷി യി വാങിനോടും പരാജയപ്പെട്ടു.
അതേസമയം മറ്റൊരു ചരിത്ര നേട്ടത്തിനും സയ്യിദ് മോദി ഇൻ്റർനാഷണൽ ടൂർണമെന്റ് സാക്ഷ്യം വഹിച്ചു. ഇന്ത്യയുടെ ട്രീസ ജോളി- ഗായത്രി ഗോപിചന്ദ് സഖ്യം തങ്ങളുടെ ആദ്യ സൂപ്പർ 300 കിരീടം നേടി. ഫൈനലിൽ ചൈനയുടെ ബാവോ ലി ജിംഗ്-ലി ക്വിയാനെ പരാജയപ്പെടുത്തി. ഇതോടെ ഇരുവരും സയ്യിദ് മോദി ഇൻ്റർനാഷണൽ ടൂർണമെൻ്റിൽ വനിതാ ഡബിൾസ് കിരീടം നേടുന്ന ആദ്യ ഇന്ത്യൻ ജോഡിയായി.
