തിയേറ്ററുകളിൽ കളക്ഷൻ വാരികൂട്ടി കുതിപ്പ് തുടരുകയാണ് ഐക്കൺ സ്റ്റാർ അല്ലു അർജുന്റെ പുഷ്പ 2. ഡിസംബർ 5 നാണ് സിനിമ തിയേറ്ററുകളിലെത്തിയത്. ആദ്യ ദിനത്തിൽ 300 കോടിക്ക് മുകളിൽ കളക്ഷൻ സ്വന്തമാക്കാൻ പുഷ്പ 2ന് കഴിഞ്ഞിരുന്നു. നാല് ദിവസം പിന്നിടുമ്പോൾ ബോക്സോഫീസ് തകർത്ത് പുഷ്പയുടെ വിളയാട്ടം തുടരുകയാണ്. ഇതിനിടെ ഇന്ത്യൻ സിനിമയുടെ ഇതിഹാസ താരമായ അമിതാഭ് ബച്ചൻ പങ്കുവച്ച പോസ്റ്റാണ് ഇപ്പോൾ സമൂഹമാദ്ധ്യമങ്ങളിൽ വൈറലാവുന്നത്.
ബിഗ്ബിയെ കുറിച്ച് അല്ലു അർജുൻ പറഞ്ഞ പ്രസ്താവനയ്ക്കുള്ള മറുപടിയായാണ് അമിതാഭ് ബച്ചൻ പോസ്റ്റ് പങ്കുവച്ചത്. അല്ലു അർജുന്റെ വാക്കുകളിൽ സന്തോഷമുണ്ടെന്നും തനിക്ക് അർഹിക്കുന്നതിനെക്കാൾ സ്ഥാനം അല്ലു അർജുൻ നൽകുന്നുവെന്നും താരം കുറിച്ചു. തങ്ങളെല്ലാവരും അല്ലു അർജുന്റെ ആരാധകരാണെന്നും അദ്ദേഹത്തിന്റെ സിനിമകൾ ഇഷ്ടപ്പെടുന്നവരാണെന്നും അമിതാഭ് ബച്ചൻ പറയുന്നു. ഞങ്ങളെ പ്രചോദിപ്പിക്കുന്നത് ഇനിയും തുടരുക. എല്ലാവിധ ആശംസകളും നേരുന്നുവെന്നും അമിതാഭ് ബച്ചൻ എക്സിൽ കുറിച്ചു.
#AlluArjun ji .. so humbled by your gracious words .. you give me more than I deserve .. we are all such huge fans of your work and talent .. may you continue to inspire us all .. my prayers and wishes for your continued success ! https://t.co/ZFhgfS6keL
— Amitabh Bachchan (@SrBachchan) December 9, 2024
പുഷ്പ 2 പ്രമോഷന്റെ ഭാഗമായി നടത്തിയ അഭിമുഖത്തിലാണ് അല്ലു അർജുൻ അമിതാഭ് ബച്ചനെ കുറിച്ച് പരാമർശിച്ചത്. തനിക്ക് ഏറെ ഇഷ്ടപ്പെട്ട നടനാണ് അമിതാഭ് ബച്ചനെന്നും അദ്ദേഹമാണ് തന്നെ പ്രചോദിപ്പിക്കുന്നതെന്നുമായിരുന്നു അല്ലുവിന്റെ വാക്കുകൾ. ഇതിന് പിന്നാലെയാണ് ബിഗ്ബിയും അല്ലുവിനെ പ്രശംസിച്ച് രംഗത്തെത്തിയത്.
ഇതാദ്യമായല്ല അമിതാഭ് ബച്ചൻ, അല്ലുവിനെ പ്രശംസിക്കുന്നത്. പുഷ്പയുടെ ആദ്യ ഭാഗം പ്രദർശനത്തിനെത്തിയ സമയത്തും അമിതാഭ് ബച്ചൻ, അല്ലുവിനെ പ്രശംസിച്ചിരുന്നു. തനിക്ക് ഇഷ്ടപ്പെട്ട യുവ നടന്മാരിൽ ഒരാളാണ് അല്ലുവെന്നും പുഷ്പയിൽ താരത്തിന്റെ അഭിനയം മികച്ചതായിരുന്നുവെന്നും അദ്ദേഹം ഒരഭിമുഖത്തിൽ വ്യക്തമാക്കിയിരുന്നു.
