പോഷകങ്ങളാൽ സമ്പന്നമായ മുട്ട ഒട്ടുമിക്കവരുടെയും പ്രിയങ്കരമായ ഐറ്റമാണ്. പ്രോട്ടീൻ ലഭിക്കാൻ ദിവസവും മുട്ട കഴിക്കുന്നവരും നിരവധിയാണ്. എന്നാൽ മുട്ട അകത്താക്കുമ്പോൾ കുറച്ച് കാര്യങ്ങൾ നാം ശ്രദ്ധിക്കണം. ചില പ്രത്യേക ആഹാരപദാർത്ഥങ്ങൾക്കൊപ്പം മുട്ട കഴിക്കുന്നത് ഒഴിവാക്കണമെന്നാണ് ആരോഗ്യവിദഗ്ധർ പറയുന്നത്. അവ എന്തെല്ലാമാണെന്ന് നോക്കാം..
ഉപ്പിലിട്ടവ
അച്ചാറുകളും ഉപ്പിലിട്ടവയുമൊക്കെ മുട്ടയുടെ കൂടെ കഴിക്കാതിരിക്കുക. കാരണം ഉപ്പിലിട്ട വസ്തുക്കളുടെ അസിഡിറ്റി ദഹനത്തെ സാവധാനമാക്കും. നാം കഴിച്ച മുട്ട ദഹിക്കാൻ താമസമുണ്ടാകുമ്പോൾ വയറിന് ചില അസ്വസ്ഥതകൾ അനുഭവപ്പെട്ടേക്കാം. അതുപോലെ തന്നെ വിറ്റമിൻ സി ധാരാളമുള്ള പഴങ്ങൾ, ഉദാഹരണത്തിന് ഓറഞ്ച്, നാരങ്ങ എന്നിവ മുട്ടയോടൊപ്പം കഴിക്കുന്നതും ഒഴിവാക്കാം. ഈ പഴങ്ങളിലും അസിഡിക് സാന്നിധ്യമുണ്ട് എന്നതിനാലാണിത്.
ചായ, കാപ്പി
തേയിലയിലുള്ള ടാനിൻ എന്ന പദാർത്ഥവും കാപ്പിയിലുള്ള കഫീനും മുട്ടയിലെ പോഷകങ്ങളെ ആവരണം ചെയ്യുന്നത് തടയുന്നു. കൂടാതെ ദഹനത്തെയും ബാധിക്കുന്നു. ചിലരിൽ വയറുവേദന അനുഭവപ്പെടാനും കാരണമാകും. അതിനാൽ മുട്ട കഴിച്ചയുടനെ ചായയും കാപ്പിയും കുടിക്കുന്നത് ഒഴിവാക്കാം.
സോയ്മിൽക്ക്
മുട്ടയിൽ അടങ്ങിയിരിക്കുന്ന പോഷകങ്ങളുടെ ദഹനത്തെ സോയ് മിൽക്കിലുള്ള പ്രോട്ടീനുകൾ തടയും. ഇത് കുടലിന്റെ പ്രവർത്തനത്തെയും ബാധിച്ചേക്കും
മത്സ്യം
മീനും മുട്ടയും ഒന്നിച്ച് കഴിക്കുന്നത് ചിലരിൽ അസ്വസ്ഥതയുണ്ടാക്കാമെന്നാണ് ആരോഗ്യവിദഗ്ധർ പറയുന്നത്. കാരണം ഇവ രണ്ടിനും വ്യത്യസ്ത തരത്തിലുള്ള ദഹനപ്രക്രിയയാണ്. അതിനാൽ വയറിൽ അസ്വസ്ഥത അനുഭവപ്പെട്ടേക്കാം.
ചീസ്
മുട്ടയിലും ചീസിലും ഉയർന്ന അളവിൽ പ്രോട്ടീനും കൊഴുപ്പുമുണ്ട്. അതിനാൽ രണ്ടും കൂടിയാകുമ്പോൾ ആഹാരം ‘ഹെവി’ ആകുന്നു. ഇത് ദഹനത്തിന് താമസം വരുത്തും. വയറിന് അസ്വസ്ഥതയും ഉണ്ടായേക്കാം.
റെഡ് മീറ്റ്
പോർക്ക്, ബീഫ്, മട്ടൺ തുടങ്ങിയ ഇറച്ചികൾ കഴിക്കുമ്പോൾ മുട്ട ഒഴിവാക്കാം. ചീസ് പോലെ തന്നെ റെഡ് മീറ്റിലും ധാരാളം
പ്രോട്ടീനുകളും കൊഴുപ്പും അടങ്ങിയിരിക്കുന്നതിനാലാണിത്.
