മേപ്പാടി; നിരന്തരം അധിക്ഷേപ പരാമർശങ്ങൾ നടത്തുന്നുവെന്ന നടി ഹണി റോസിന്റെ പരാതിയിൽ കസ്റ്റഡിയിലെടുത്ത വ്യവസായി ബോബി ചെമ്മണ്ണൂരിനെയും കൊണ്ട് പൊലീസ് കൊച്ചിയിലേക്ക് തിരിച്ചു. പൊലീസിന്റെ ബൊലേറോ ജീപ്പിലാണ് ബോബി ചെമ്മണ്ണൂരിന്റെ യാത്ര. സ്വന്തം വാഹനം ഉണ്ടായിരുന്നെങ്കിലും ഇതിൽ യാത്ര ചെയ്യാൻ പൊലീസ് അനുവദിച്ചില്ലെന്നാണ് വിവരം.
ബോബി ചെമ്മണ്ണൂരിന്റെ വാഹനം പൊലീസ് ജീപ്പിന് തൊട്ടുപിന്നാലെ കൊച്ചിയിലേക്ക് തിരിച്ചിട്ടുണ്ട്. രാവിലെയാണ് മേപ്പാടിയിലുള്ള 1000 ഏക്കർ എന്ന റിസോർട്ടിൽ നിന്ന് ബോബി ചെമ്മണ്ണൂരിനെ കസ്റ്റഡിയിലെടുത്തത്. ഇന്നലെ രാത്രി കൊച്ചിയിൽ നിന്നും പൊലീസ് വയനാട്ടിലേക്ക് എത്തിയിരുന്നു. കസ്റ്റഡിയിലെടുത്ത ശേഷം അദ്ദേഹത്തിന്റെ വാഹനത്തിൽ ബോബി ചെമ്മണ്ണൂരിനെ പുത്തൂർവയലിലെ എആർ ക്യാമ്പിലെത്തിച്ചു. അവിടെ നിന്നാണ് പൊലീസ് ജീപ്പിൽ കൊച്ചിയിലേക്ക് കൊണ്ടുപോയത്.
റിസോർട്ടിൽ നിന്ന് 10 കിലോമീറ്റർ മാറിയാണ് ക്യാമ്പ്. ബോബി ചെമ്മണ്ണൂരിനെ പൊലീസ് ക്യാമ്പിൽ എത്തിച്ച വിവരം അറിഞ്ഞ് മാദ്ധ്യമപ്രവർത്തകരും ക്യാമ്പിന് പുറത്ത് എത്തിയിരുന്നു. എന്നാൽ ചാനൽ ക്യാമറകൾക്ക് പിടികൊടുക്കാതിരിക്കാൻ ക്യാമ്പിന്റെ രണ്ടാമത്തെ ഗേറ്റ് വഴിയാണ് പുറത്തേക്ക് കൊണ്ടുപോയത്. എന്നാൽ ഇവിടെയും ക്യാമറകൾ കാത്തുനിന്നിരുന്നു.
മുൻകൂർ ജാമ്യത്തിനുൾപ്പെടെ ശ്രമിക്കുന്നതിനിടെയാണ് ബോബി ചെമ്മണ്ണൂരിനെ അപ്രതീക്ഷിത നീക്കത്തിലൂടെ പൊലീസ് കസ്റ്റഡിയിലെടുത്തത്. വൈകിയാൽ സംസ്ഥാനത്തിന് പുറത്തേക്ക് പോയാൽ അറസ്റ്റ് ഉൾപ്പെടെയുള്ള നടപടികൾക്ക് ബുദ്ധിമുട്ടാകുമെന്ന വിലയിരുത്തലിനെ തുടർന്നാണ് വയനാട്ടിൽ നിന്ന് തന്നെ കസ്റ്റഡിയിലെടുക്കാൻ തീരുമാനിച്ചത്.
ഇന്നലെയാണ് ബോബി ചെമ്മണ്ണൂരിന്റെ പേര് പറഞ്ഞ് ഹണി റോസ് എറണാകുളം സെൻട്രൽ പൊലീസിൽ പരാതി നൽകിയത്. ഇതിന് പിന്നാലെ മുഖ്യമന്ത്രിയോടും ഹണി റോസ് പരാതിയെക്കുറിച്ച് ഫോണിൽ സംസാരിച്ചിരുന്നു. പിന്നാലെ ഡിജിപിയുമായും സംസാരിച്ചിരുന്നതായും എത്രയും വേഗം നടപടിയെടുക്കുമെന്ന് ഇരുവരും ഉറപ്പ് നൽകിയിരുന്നുവെന്നും നടി പറഞ്ഞു.
