പ്രയാഗ്‌രാജിലെ ത്രിവേണി സംഗമത്തിലെ പുണ്യ സ്നാനത്തിനായി കോടിക്കണക്കിന് പേരാണ് ഒഴുകിയെത്തുന്നത്. കുംഭമേളയിലെ ചിത്രങ്ങളും വിവരങ്ങളുമൊക്കെ സാധാരണക്കാരിലേക്ക് വരെ എത്തുന്നുണ്ട്. ഇന്ത്യയുടെ ഡിജിറ്റൽ കുതിപ്പാണ് ഇതിലൂടെ പ്രകടമാകുന്നത്. മഹാകുംഭമേളയെ കുറിച്ചുള്ള വിവരങ്ങൾ തത്സമയം നമ്മുടെ മൊബൈൽ ഫോണിലും എത്തുന്നുണ്ടാകും. പലതും സമൂഹമാദ്ധ്യമങ്ങളിൽ വൈറലാവുകയാണ്. അത്തരത്തിൽ തരംഗമാകുന്നൊരാളാണ് മഹാകുംഭമേളയിലെ ‘IIT ബാബ’.
ഐഐടിയും കുംഭമേളയും തമ്മിലെന്താണ് ബന്ധമെന്ന് വരെ ചിന്തിച്ചേക്കാം. അഭയ് സിംഗ് എന്ന സന്ന്യാസിവര്യനെയാണ് ഐഐടി ബാബ എന്നു വിളിക്കുന്നത്. ഐഐടി ബോംബൈയിലെ പൂർവവിദ്യാർത്ഥിയാണ് മഹാകുംഭമേളയുടെ ആദ്യദിനത്തിൽ പ്രയാഗ്‌രാജിലെത്തിയ അഭയ് സിംഗ്. എയ്‌റോസ്‌പേസ് എഞ്ചിനീയറിംഗിൽ പഠനം പൂർത്തിയാക്കിയെങ്കിലും ശാസ്ത്രത്തിൽ നിന്ന് വ്യതിചലിച്ച് ആത്മീയത പാത തെരഞ്ഞെടുക്കുകയായിരുന്നു.
ഹരിയാന സ്വദേശിയാണ് അഭയ് സിംഗ്. ഐഐടിയിലെ ബിരുദ പഠനത്തിന് ശേഷം ഡിസൈനിൽ ബിരുദാനന്തരം ബിരുംദം കരസ്ഥമാക്കി. പിന്നീട് ഫോട്ടോഗ്രഫി മേഖലയിലേക്ക് തിരഞ്ഞു, പിന്നീട് ആത്മീയ വഴിയിലേക്കും. അറിവിനെ പിന്തുടർന്നാൽ ഇവിടെ എത്തിച്ചേരുമെന്നും മഹാകുംഭമേളയിൽ പങ്കെടുക്കവേ അദ്ദേഹം പറഞ്ഞു. എഞ്ചിനീയറിംഗ് പഠന കാലത്ത് തന്നെ ജീവിതത്തിന്റെ അന്തഃസത്ത മനസിലാക്കുന്നതിനായി പോസ്റ്റ് മോഡേണിസം, സൊക്രട്ടീസ്, പ്ലേറ്റോ എന്നിവരുടെ തത്ത്വചിന്ത പുസ്തകങ്ങൾ വായിച്ചിരുന്നുവെന്ന് അദ്ദേഹം വെളിപ്പെടുത്തി.
ദേശീയ മാദ്ധ്യമത്തിന് നൽകിയ അഭിമുഖത്തിലാണ് അഭയ് സിംഗ് പ്രതികരിച്ചത്. അഭിമുഖം സോഷ്യൽ മീഡിയയിൽ വൈറലാവുകയാണ്. പണത്തിന് പകരം അറിവിനെ പിന്തുടരുന്ന സിംഗ് മാതൃകയാണെന്ന് പലരും പ്രശംസിച്ചു.
