പത്തനംതിട്ട: മലക്കര റൈഫിൾ ക്ലബിന്റെ നിർമാണത്തിലിരുന്ന മതിൽ ഇടിഞ്ഞുവീണ് രണ്ട് പേര് മരിച്ചു. ഇവിടെ ജോലിചെയ്തിരുന്ന നിർമ്മാണത്തൊഴിലാളികളാണ് മരിച്ചത്. ബിഹാരി സ്വദേശി ഗുഡുകുമാർ, ബംഗാൾ സ്വദേശി രത്തൻ മണ്ഡേൽ എന്നിവർക്കാണ് അപകടത്തിൽ ജീവൻ നഷ്ടമായത്.
സംഭവ സ്ഥലത്ത് മൂന്ന് തൊഴിലാളികളാണ് നിർമ്മാണത്തിൽ ഏർപ്പെട്ടിരുന്നത്. പത്തടി ഉയരമുള്ള മതിലിന്റെ ബീം ഇടിഞ്ഞുവീഴുകയായിരുന്നുവെന്ന് ദൃക്‌സാക്ഷികൾ പറയുന്നു. മതിൽ ഇടിഞ്ഞുവീഴുന്നത് കണ്ട് ഓടി മാറിയ ഒരാൾ അത്ഭുതകരമായി രക്ഷപ്പെട്ടു. ഗുരുതരമായി പരിക്കേറ്റ രണ്ടുപേരെ ഉടൻതന്നെ ആശുപത്രിയിലെത്തിച്ചെങ്കിലും മരണപ്പെട്ടിരുന്നു. ആരോഗ്യമന്ത്രി വീണ ജോർജ്, ആന്റോ ആന്റണി എംപി തുടങ്ങിയവർ സംഭവ സ്ഥലം സന്ദർശിച്ചു.
