2025 ഐപിഎൽ മെഗാലേലത്തിലേക്ക് ജോസ് ബട്ലറെ ടീമിൽ നിന്നും റിലീസ് ചെയ്‍തത് തന്നെ സംബന്ധിച്ചിടത്തോളം വെല്ലുവിളി നിറഞ്ഞ തീരുമാനങ്ങളിലൊന്നായിരുന്നുവെന്ന് രാജസ്ഥാൻ റോയൽസ് ക്യാപ്റ്റൻ സഞ്ജു സാംസൺ. ബട്ലർ ഏറ്റവും അടുത്ത സുഹൃത്തുക്കളിൽ ഒരാളാണെന്നും തന്നെ ഒരു നല്ല ക്യാപ്റ്റൻ ആകാൻ സഹായിച്ച താരമാണെന്നും സഞ്ജു പറഞ്ഞു. ബട്ലറെ ടീമിൽ നിന്നും നഷ്ടമായെങ്കിലും തനിക്ക് ആ മാറ്റം ഇപ്പോഴും ഉൾകൊളുക്കുവാൻ ആയിട്ടില്ലെന്നും താരം പറഞ്ഞു.
“അദ്ദേഹത്തെ വിട്ടയയ്‌ക്കുക എന്നത് എനിക്ക് ഏറ്റവും വെല്ലുവിളി നിറഞ്ഞ തീരുമാനങ്ങളിലൊന്നാണ്. ജോസ് ബട്ലർ എന്റെ ഏറ്റവും അടുത്ത സുഹൃത്തുക്കളിൽ ഒരാളാണ്. ഞങ്ങൾ ഏഴ് വർഷത്തോളം ഒരുമിച്ച് കളിച്ചു. ഈ സമയത്ത്, ഞങ്ങളുടെ ബാറ്റിംഗ് പങ്കാളിത്ത സമയം തന്നെ വളരെ നീണ്ടതാണ്. അതിനാൽ ഞങ്ങൾ പരസ്പരം നന്നായി അറിയാൻ കഴിഞ്ഞു. അദ്ദേഹം എനിക്ക് ഒരു ജ്യേഷ്ഠനെ പോലെയാണ്. എനിക്ക് സംശയം തോന്നുമ്പോഴെല്ലാം ഞാൻ അദ്ദേഹത്തോട് സംസാരിക്കുമായിരുന്നു. (2021 ൽ) ഞാൻ ക്യാപ്റ്റനായപ്പോൾ, അദ്ദേഹം എന്റെ വൈസ് ക്യാപ്റ്റനായിരുന്നു, ഒരു നല്ല ക്യാപ്റ്റനാകാൻ എന്നെ സഹായിച്ചു.” സഞ്ജു പറഞ്ഞു.
2018 മുതൽ 2024 വരെ ബട്ലർ രാജസ്ഥാനൊപ്പമുണ്ടായിരുന്നു. ഈ കാലയളവിൽ, 83 കളികളിൽ നിന്ന് 41.84 ശരാശരിയിലും 147.79 സ്ട്രൈക്ക് റേറ്റിലും 3055 റൺസ് നേടിയ അദ്ദേഹം ടീമിന്റെ മുൻനിര റൺവേട്ടക്കാരനായിരുന്നു. 2025 സീസണിന് മുമ്പ്, രാജസ്ഥാൻ ആറ് കളിക്കാരെ നിലനിർത്തി, എന്നാൽ ബട്ലർ അവരിൽ ഒരാളായിരുന്നില്ല. മെഗാ ലേലത്തിൽ ബട്ട്ലർ ഇല്ലെങ്കിലും, രാഹുൽ ദ്രാവിഡ് വീണ്ടും പരിശീലകനായി രാജസ്ഥാനിൽ തിരിച്ചെത്തിയതോടെ സഞ്ജു കൂടുതൽ ആത്മവിശ്വാസത്തിലാണ്. 2013 ൽ സഞ്ജു ഐ‌പി‌എല്ലിൽ അരങ്ങേറ്റം കുറിച്ചപ്പോൾ ദ്രാവിഡ് രാജസ്ഥാന്റെ ക്യാപ്റ്റനായിരുന്നു. തുടർന്നുള്ള രണ്ട് സീസണുകളിൽ അദ്ദേഹം ടീമിന്റെ മെന്ററായി തുടർന്നു.
