ചെന്നൈ: ധനുഷ് സംവിധാനം ചെയ്യുന്ന പുതിയ സിനിമയുടെ സെറ്റിൽ തീപിടിത്തം. ധനുഷ് സംവിധാനവും സഹനിർമാണവും നിർവഹിക്കുന്ന ‘ഇഡ്ലി കടൈ’ എന്ന സിനിമയുടെ സെറ്റിലാണ് തീപിടിത്തമുണ്ടായത്. തമിഴ്നാട്ടിലെ തേനി ആണ്ടിപ്പെട്ടി ഗ്രാമത്തിലാണ് സംഭവം. ആർക്കും പരിക്കേറ്റിട്ടില്ലെന്നാണ് വിവരം.
ആണ്ടിപ്പെട്ടിയിലെ ഷെഡ്യൂൾ പൂർത്തിയാക്കി മടങ്ങാൻ ഒരുങ്ങുന്നതിനിടെയാണ് അപകടമുണ്ടായത്. തീപിടിക്കാനുള്ള കാരണം വ്യക്തമല്ല. സെറ്റ് പൂർണമായും കത്തിനശിച്ചിട്ടുണ്ട്. ഫയർഫോഴ്സ് എത്തിയാണ് തീ നിയന്ത്രണവിധേയമാക്കിയത്. തീപിടിത്തത്തിന്റെ ദൃശ്യങ്ങൾ പുറത്തുവന്നു.
#WATCH | Theni, Tamil Nadu | A fire broke out at the Idly Kadai movie set yesterday in Anuppapatti village in Andipatti block. The film, directed and co-produced by Dhanush and starring the actor, is set for release later this year. The filming for Idly Kadai had completed its… pic.twitter.com/fKVSnZFeIm
— ANI (@ANI) April 20, 2025
ചെറിയ തീപിടിത്തം ശക്തമായ കാറ്റിൽ സെറ്റാകെ പടർന്നുപിടിക്കുകയായിരുന്നു. തേനിയിലെ തന്നെ മറ്റൊരു സ്ഥലത്തേക്ക് ഷൂട്ട് ആരംഭിച്ചെങ്കിലും ആണ്ടിപ്പെട്ടിയിൽ നിർമിച്ച സെറ്റ് അണിയറപ്രവർത്തകർ പൊളിച്ചുമാറ്റിയിരുന്നില്ല. അപകടസമയത്ത് സ്ഥലത്ത് ആരും ഉണ്ടായിരുന്നില്ല.
ധനുഷ് സംവിധാനം ചെയ്യുന്ന നാലാമത്തെ ചിത്രമാണ് ഇഡ്ലി കടൈ. ധനുഷാണ് ചിത്രത്തിലെ നായകൻ. നിത്യ മേനോൻ, സത്യരാജ്, അരുൺ വിജയ് എന്നിവർ ചിത്രത്തിൽ പ്രധാനവേഷങ്ങൾ ചെയ്യുന്നു. ഒക്ടോബറിലാണ് ഇഡ്ലി കടൈ തിയേറ്ററുകളിലെത്തുന്നത്.
