തിരുവനന്തപുരം: തിരുവനന്തപുരത്ത് ആള് മാറി യുവാവിന് മർദ്ദനം. തിരുമല സ്വദേശി പ്രവീണിനെയാണ് 10 അംഗ സംഘം മർദ്ദിച്ചത്. ഇയാളെ തട്ടിക്കൊണ്ടു പോയി മർദ്ദിക്കുകയായിരുന്നു. ഇതിന്റെ സി സി ടി വി ദൃശ്യങ്ങൾ പുറത്തു വന്നിട്ടുണ്ട്.രണ്ടു ദിവസം മുൻപാണ് സംഭവം.
പൂജപ്പുര സ്വദേശിയായ വിഷ്ണു എന്ന യുവാവിനെ ഒരു പെണ്കുട്ടിയുമാറ്റി ബന്ധപ്പെട്ട പ്രശ്‌നത്തിൽ പോലീസ് ചോദ്യം ചെയ്തു വിട്ടയച്ചിരുന്നു. വിഷ്ണു പിന്നീട് ആത്മഹത്യ ചെയ്തു. തുടർന്ന് വിഷ്ണുവിന്റെ സുഹൃത്തുക്കളായ പത്തംഗ സംഘം ഈ പെൺകുട്ടിയുടെ ബന്ധുവിനെ അന്വേഷിച്ചിറങ്ങി. ഈ സംഘം ശാന്തികവാടം ശ്മശാനത്തിനു മുന്നിൽ വെച്ച് പ്രവീണിനെ കണ്ടു മുട്ടി. പ്രവീണാണ് പെൺകുട്ടിയുടെ ബന്ധു എന്ന് തെറ്റിദ്ധരിച്ച ഇവർ പ്രവീണിനെ തട്ടിക്കൊണ്ടു പോയി മരണവീട്ടിൽ വെച്ച് ക്രൂരമായി മർദ്ദിച്ചു. മർദ്ദനത്തിന്റെ ഒടുവിലാണ് തങ്ങൾ അന്വേഷിച്ച പെൺകുട്ടിയുടെ ബന്ധുവല്ല ഇയാൾ എന്ന് അവർ തിരിച്ചറിയുന്നത്. തുടർന്ന് ഇവർ വഴിയരികിൽ പ്രവീണിനെ ഉപേക്ഷിച്ച് കടന്നു കളഞ്ഞു.
സംഘത്തിലെ 7 പേർ തമ്പാനൂർ പോലിസിന്റെ പിടിയിലായിട്ടുണ്ട്.
