മനാമ :ബഹ്‌റൈൻ കേരളീയ സമാജം – സ്‌കൂൾ ഓഫ് ഡ്രാമ സംഘടിപ്പിക്കുന്ന പ്രൊഫ: നരേന്ദ്രപ്രസാദ് അനുസ്മരണ നാടകോത്സവം നാളെ വൈകിട്ട് 8 മണിക്ക് ദിവ്യ നരേന്ദ്രപ്രസാദ് ഉദ്‌ഘാടനം ചെയ്യുന്നു. ഒരു ദിവസം പരമാവധി നാല്പത് മിനിറ്റ് ദൈർഘ്യമുള്ള രണ്ട് നാടകങ്ങൾ വീതം നാല് ദിവസങ്ങളിലായി എട്ട് നാടകങ്ങൾ അരങ്ങേറുന്നു. പ്രശസ്‌തരായ നാടക രചയിതാക്കളുടെ സൃഷ്ടികൾക്കൊപ്പം ബഹറിനിൽ നിന്നുള്ള മൗലിക രചനകളുടെ നാടകാവിഷ്കാരങ്ങളും ചേർന്നതാണ് ഈ വർഷത്തെ നരേന്ദ്രപ്രസാദ് അനുസ്മരണ നാടകോത്സവം.
ബഹ്‌റിനിലെ നാടകങ്ങളുടെ ഈറ്റില്ലമായ ബഹ്‌റൈൻ കേരളീയ സമാജത്തിലെ നാടകപ്രവർത്തനങ്ങളുടെ ഭാഗമായി പ്രതിഭാധനരായ സംവിധായകർക്കും അഭിനേതാക്കൾക്കുമൊപ്പം രംഗകലയെ സ്നേഹിക്കുന്ന നവാഗതരായ നിരവധി അഭിനേതാക്കളും സാങ്കേതിക പ്രവർത്തകരും ഈ നാടകോത്സവത്തിന്റെ ഭാഗമാകുന്നു. രണ്ട് മാസത്തോളം നീണ്ട പരിശ്രമത്തിനൊടുവിൽ കാലിക പ്രസക്‌തിയുള്ള വിവിധങ്ങളായ പ്രമേയങ്ങളും വ്യത്യസ്തമായ നാടകസങ്കേതങ്ങളുമായാണ് ഓരോ നാടകങ്ങളും പ്രേക്ഷകരുടെ മുന്നിലേക്കെത്തുന്നത്. ആയതിനാൽ ഈ നാടകോത്സവം തീർച്ചയായും നവ്യമായൊരു നാടകാനുഭവം സമ്മാനിക്കുമെന്നുറപ്പാണ്.
ജൂൺ 12,13,14,15 തീയതികളിലെയായി നടക്കുന്ന പ്രൊഫ: നരേന്ദ്രപ്രസാദ് അനുസ്മരണ നാടകോത്സവത്തിലേക്ക് എല്ലാ നാടകാസ്വാദകരെയും സ്നേഹപൂർവ്വം സ്വാഗതം ചെയ്യുന്നതായി സമാജം പ്രസിഡന്റ് പി വി രാധാകൃഷ്ണ പിള്ള ജനറൽ സെക്രട്ടറി വർഗീസ് കാരക്കൽ എന്നിവർ അറിയിച്ചു .
