ന്യൂഡെല്‍ഹി: ഐക്യരാഷ്‌ട്ര സഭയുടെ സുസ്ഥിര വികസന ലക്ഷ്യ (എസ്ഡിജി) സൂചികയില്‍ ആദ്യമായി ആദ്യത്തെ 100 റാങ്കിനുള്ളില്‍ ഇടം പിടിച്ച് ഇന്ത്യ. സുസ്ഥിര വികസന റിപ്പോര്‍ട്ട് പ്രകാരം 2025 ലെ എസ്ഡിജി സൂചികയില്‍ 67 സ്‌കോര്‍ നേടിയാണ് ഇന്ത്യ 99ാം സ്ഥാനത്തെത്തിയിരിക്കുന്നത്. കഴിഞ്ഞ വര്‍ഷത്തെ 109 ാം റാങ്കില്‍ നിന്ന് 10 സ്ഥാനങ്ങള്‍ മെച്ചപ്പെടുത്തിയാണ് ഇന്ത്യയുടെ മുന്നേറ്റം. 2023 ല്‍ 112 ാം റാങ്കും 2022 ല്‍ 121 ാം റാങ്കുമായിരുന്നു യുഎന്‍ എസ്ഡിജി സൂചികയില്‍ ഇന്ത്യക്ക്.
ഒന്നാമത് ഫിന്‍ലന്‍ഡ്
യൂറോപ്യന്‍ രാജ്യങ്ങളാണ് യുഎന്‍ പട്ടികയില്‍ മുന്നിലെത്തിയിരിക്കുന്നത്. പട്ടികയിലെ ആദ്യ 20 റാങ്കുകളില്‍ 19 ഉം യൂറോപ്യന്‍ രാജ്യങ്ങളാണ്. ഫിന്‍ലാന്‍ഡ് ഒന്നാം സ്ഥാനവും സ്വീഡനും ഡെന്‍മാര്‍ക്കും രണ്ടും മൂന്നും റാങ്കുകളും നേടി. കാലാവസ്ഥ, ജൈവവൈവിധ്യ ലക്ഷ്യങ്ങള്‍ കൈവരിക്കുന്നതില്‍ ഈ രാജ്യങ്ങള്‍ പോലും പ്രയാസപ്പെടുന്നെന്ന് യുഎന്‍ റിപ്പോര്‍ട്ട് പറയുന്നു.
അയല്‍ക്കാരുടെ റാങ്കിംഗ്
74.4 സ്‌കോറുമായി ചൈനക്ക് 49ാം സ്ഥാനമാണ് എസ്ഡിജി സൂചികയില്‍. ഭൂട്ടാന്‍ 70.5 പോയിന്റുമായി 74ാം സ്ഥാനത്തും, നേപ്പാള്‍ 68.6 പോയിന്റുമായി 85ാം സ്ഥാനത്തും, ബംഗ്ലാദേശ് 63.9 പോയിന്റുമായി 114ാം സ്ഥാനത്തും, പാകിസ്ഥാന്‍ 57 പോയിന്റുമായി 140ാം സ്ഥാനത്തുമാണ്. മാലിദ്വീപ് 53ാം സ്ഥാനവും ശ്രീലങ്ക 93ാം സ്ഥാനവും നേടി. 75.2 പോയിന്റുമായി യുഎസ് 44ാം സ്ഥാനത്തുണ്ട്.
സുസ്ഥിര ഭാവി
മെച്ചപ്പെട്ടതും സുസ്ഥിരവുമായ ഭാവി എല്ലാവര്‍ക്കും എന്ന ലക്ഷ്യവുമായി 2015 ലാണ് സുസ്ഥിര വികസന ലക്ഷ്യങ്ങള്‍ യുഎന്‍ പ്രഖ്യാപിച്ചത്. 2030 ആകുമ്പോഴേക്കും ആഗോള വികസനത്തില്‍ ആരും പിന്നോട്ട് പോകില്ലെന്ന് ഉറപ്പാക്കുന്നതിന് 17 ലക്ഷ്യങ്ങളാണ് മുന്നോട്ടു വെച്ചിരിക്കുന്നത്. ഇവയില്‍ ഊന്നിയുള്ള രാജ്യങ്ങളുടെ പ്രവര്‍ത്തനങ്ങള്‍ക്ക് 0 മുതല്‍ 100 വരെയുള്ള സ്‌കെയിലിലാണ് സ്‌കോര്‍ നല്‍കുന്നത്. 17 ലക്ഷ്യങ്ങളും പൂര്‍ണ്ണമായും നേടിയാല്‍ 100 പോയന്റ് ലഭിക്കും.
