പാലക്കാട്: പാലക്കാട് ഒറ്റപ്പാലത്ത് ട്രെയിൻ അട്ടിമറിക്കാൻ ശ്രമം. റെയിൽപാളത്തിൽ ഇരുമ്പ് ക്ലിപ്പുകൾ സ്ഥാപിച്ച നിലയിൽ കണ്ടെത്തി. പാളത്തിലെ അഞ്ചിടങ്ങളിലാണ് ക്ലിപ്പുകൾ കണ്ടെത്തിയത്. ഒറ്റപ്പാലം, ലക്കിടി റെയിൽവേ സ്റ്റേഷനുകൾക്കിടയിലാണ് സംഭവം.
മായത്തൂർ പാലത്തിന് സമീപത്തായാണ് ഇരുമ്പ് ക്ലിപ്പുകൾ കണ്ടെത്തിയത്. ബോധപൂർവ്വം സ്ഥാപിച്ചത് തന്നെയാണിവയെന്നാണ് പ്രാഥമിക വിവരം. ആർപിഎഫും പൊലീസും ഉൾപ്പെടെ സംഭവസ്ഥലത്തെത്തി അന്വേഷണം നടത്തുന്നുണ്ട്. മനഃപൂർവ്വമായി അട്ടിമറി നടത്താൻ വേണ്ടിയാണ് ഇരുമ്പ് ക്ലിപ്പുകൾ സ്ഥാപിച്ചതെന്ന് ഉദ്യോഗസ്ഥർ പറഞ്ഞു. സംഭവത്തിൽ അന്വേഷണം പുരോഗമിക്കുന്നുണ്ട്.
തമിഴ്നാട്, പാലക്കാട് എന്നിവിടങ്ങളിൽ നിന്ന് ഷൊർണൂർ റെയിൽവേ സ്റ്റേഷനുകളിലേക്ക് പോകുന്ന ട്രെയിനുകളും തൃശൂരിൽ നിന്നും തിരുവനന്തപുരത്തേക്ക് പോകുന്ന ട്രെയിനുകളും കടന്നുപോകുന്ന സ്ഥലത്താണ് ഇത്തരമൊരു സംഭവം.
അടുത്തിടെ കണ്ണൂർ വളപ്പട്ടണത്ത് കല്ലുകളും കോൺഗ്രീറ്റ് സ്ലാവുകളും റെയിൽവേ ട്രാക്കിൽ സ്ഥാപിച്ച നിലയിൽ കണ്ടെത്തിയത്. ഇതിന്റെ അന്വേഷണം നടക്കുന്നതിനിടെയാണ് വീണ്ടും അട്ടിമറി സാധ്യത റിപ്പോർട്ട് ചെയ്യുന്നത്.
