മലപ്പുറം: സ്വകാര്യ ആശുപത്രിയിലെ നഴ്സ് ആത്മഹത്യ ചെയ്ത സംഭവത്തിൽ ആശുപത്രി മുൻ ജനറൽ മാനേജർ അറസ്റ്റിൽ. വളാഞ്ചേരി സ്വദേശിയായ അബ്ദുറഹിമാനാണ് അറസ്റ്റിലായത്. കുറ്റിപ്പുറം സ്വകാര്യ ആശുപത്രിയിലെ നഴ്സ് കോതമംഗലം സ്വദേശിനിയായ അമീനയാണ് ആത്മഹത്യ ചെയ്തത്. അമിതമായി ഗുളിക കഴിച്ചാണ് യുവതി ജീവനൊടുക്കിയത്.
മറ്റൊരു സ്ഥാപനത്തിൽ ജോലിക്ക് കയറുന്നതിനായി എക്സ്പീരിയൻസ് സർട്ടിഫിക്കറ്റ് ആവശ്യപ്പെട്ടെങ്കിലും അബ്ദുറഹിമാൻ നൽകിയിരുന്നില്ല. രണ്ട് വർഷത്തിലേറെയായി അമീന ഈ ആശുപത്രിയിലാണ് ജോലി ചെയ്തിരുന്നത്. പല കാരണങ്ങൾ പറഞ്ഞാണ് അബ്ദുറഹിമാൻ എക്സ്പീരിയൻസ് സർട്ടിഫിക്കറ്റിന് അനുമതി നൽകാതിരുന്നത്. ഇക്കാരണത്താൽ മാനസിക വിഷമത്തിലായിരുന്നു യുവതി. പ്രതി യുവതിയെ മാനസികമായി പീ‍ഡിപ്പിച്ചിരുന്നുവെന്നും അമീനയുടെ ബന്ധുക്കൾ പറഞ്ഞു.
സംഭവത്തിൽ പ്രതിഷേധിച്ച് വിവിധ സംഘടനകൾ മാർച്ച് നടത്തി. അമീനയുടെ ആത്മഹത്യയ്‌ക്ക് ശേഷം ആശുപത്രി അധികൃതർ അബ്ദുറഹിമാനെ സസ്പെൻഡ് ചെയ്തിരുന്നു. ഇതിന് പിന്നാലെ ഒളിവിൽ കഴിയുകയായിരുന്നു ഇയാൾ.
