തിരുവനന്തപുരം : പയ്യന്നൂർ നിയമസഭാമണ്ഡലത്തിലെ ബൂത്ത് ലെവൽ ഓഫീസർ ശ്രീ അനീഷ് ജോർജിന്റെ അകാലനിര്യാണത്തിൽ അഗാധമായ ദുഖം രേഖപ്പെടുത്തുന്നുവെന്നും ദുഖാർദ്രരായ കുടുംബത്തെ അനുശോചനം അറിയിക്കുന്നതായും മുഖ്യതെരഞ്ഞെടുപ്പ് ഓഫീസർ ഡോ. രത്തൻ യു കേൽക്കർ ഐ എ എസ് അറിയിച്ചു.
തികഞ്ഞ ആത്മാർത്ഥതയോടെ എക്കാലത്തും തന്റെ കർമ്മമേഖലയിൽ പ്രവർത്തിച്ച ശ്രീ അനീഷ് ജോർജ് വോട്ടർപ്പട്ടികയുടെ തീവ്ര പരിഷ്കരണത്തിൽ തികഞ്ഞ സമർപ്പണമനോഭാവത്തോടെ പ്രവർത്തിച്ച ഉദ്യോഗസ്ഥനാണ്. ഇന്ത്യൻ തെരഞ്ഞെടുപ്പ് കമ്മീഷന്റെ കർമ്മപഥത്തിൽ ഏറ്റവും അടിത്തട്ടിൽ പ്രവർത്തിക്കുന്ന, വോട്ടർമാരുമായി നേരിട്ട് സംവദിക്കുന്ന, കൃത്യവും സമഗ്രവുമായ വോട്ടർപ്പട്ടിക തയ്യാറാക്കുന്ന ജീവനക്കാരാണ് ബൂത്ത് ലെവൽ ഉദ്യോഗസ്ഥർ.
അർഹതപ്പെട്ട ഓരോ വോട്ടറെയും വോട്ടർപ്പട്ടികയിൽ ഉൾപ്പെടുത്തണമെന്ന ലക്ഷ്യത്തോടെ ജില്ലാതല ഉദ്യോഗസ്ഥരുൾപ്പെടുന്ന ഒരു വലിയ നിര ജീവനക്കാർ വോട്ടർപ്പട്ടികയുടെ സമഗ്രപരിഷ്കരണവുമായി ബന്ധപ്പെട്ട് പ്രവർത്തിക്കുന്നുണ്ട്. ഇലക്ഷൻ കമ്മീഷൻ ഓഫ് ഇന്ത്യയുടെ നിർദ്ദേശാനുസരണം തികഞ്ഞ ഏകീകരണത്തോടെ മൊത്തം ഇലക്ഷൻ സംവിധാനവും പ്രവർത്തിക്കുന്ന ഈ ഘട്ടത്തിൽ ഒരു ഉദ്യോഗസ്ഥനു പോലും പ്രയാസം നേരിടരുതെന്ന് ഞങ്ങൾ ഉറപ്പുവരുത്തുന്നുണ്ട്.
മുഖ്യതെരഞ്ഞെടുപ്പ് ഓഫീസർ എന്ന നിലയിൽ ഈ ഘട്ടത്തിൽ ഒരിക്കൽക്കൂടി തന്റെ ആത്മാർത്ഥമായ ദുഖവും അനുശോചനവും അദ്ദേഹത്തിന്റെ കുടുംബത്തെ അറിയിക്കുന്നതായി മുഖ്യ തിരഞ്ഞെടുപ്പ് ഓഫീസർപത്രക്കുറിപ്പിൽ അറിയിച്ചു.
