ന്യൂഡൽഹി: ജി20 ഉച്ചകോടിയുടെ ഭാഗമായി ദക്ഷിണാഫ്രിക്ക സന്ദർശനത്തിനിടെ ഇറ്റാലിയൻ പ്രധാനമന്ത്രി ജോർജിയ മെലോണിയുമായി സൗഹൃദനിമിഷം പങ്കിട്ട് പ്രധാനമന്ത്രി നരേന്ദ്രമോദി. പരസ്പരം തമാശ പറഞ്ഞും പൊട്ടിച്ചിരിച്ചും നിൽക്കുന്ന ഇരുവരുടെയും വീഡിയോ പുറത്തുവന്നിട്ടുണ്ട്. ഇരുവരും അഭിവാദ്യം ചെയ്യുന്നതും ഹസ്തദാനം നൽകുന്നതും വീഡിയോയിൽ കാണാം.
ബ്രസീൽ പ്രസിഡന്റ് ലൂയിസ് ഇനാസിയോ ലുല ഡ സിൽവ ഉൾപ്പെടെ നിരവധി ലോകനേതാക്കളുമായും പ്രധാനമന്ത്രി കൂടിക്കാഴ്ച നടത്തി. ജോഹന്നാസ്ബർഗിൽ എത്തിയ പ്രധാനമന്ത്രിക്ക് ഊഷ്മള സ്വീകരണമാണ് നൽകിയത്. പരമ്പരാഗത കലാരൂപങ്ങളോടെ അദ്ദേഹത്തെ വരവേറ്റു. വിവിധ സംസ്ഥാനങ്ങളിലെ സാംസ്കാരിക പരിപാടികളും സംഘടിപ്പിച്ചിരുന്നു.
ഉച്ചകോടിക്ക് ശേഷം മറ്റ് നേതാക്കളുമായും പ്രധാനമന്ത്രി കൂടിക്കാഴ്ച നടത്തുമെന്നാണ് വിവരം. ദക്ഷിണാഫ്രിക്കയിലേക്കുള്ള പ്രധാനമന്ത്രി നാലാമത്തെ സന്ദർശനമാണിത്. ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശക്തമാക്കുന്നതിന്റെ ഭാഗമാണ് ഈ സന്ദർശനം.
