ഇന്ത്യൻ സൈനികന്റെ പോരാട്ട വിര്യത്തെയും ആത്മധൈര്യത്തെയും അധിക്ഷേപിച്ച് നടൻ വിനായകൻ. ‘ഡ്രഗ്’ അടിച്ചാണ് പട്ടാളത്തിൽ മുൻനിര പോരാളികൾ യുദ്ധത്തിന് പോവുകയെന്നും മരിക്കാൻ തയാറായ അവരെ പോലെയാണ് താനെന്നുമായിരുന്നു വിനായകന്റെ വാക്കുകൾ.
മിലിട്ടിറിയിൽ ലഹരിയില്ലാത്ത എന്ത് യുദ്ധം. ഇന്ത്യൻ മിലിട്ടറിയിലും ഇസ്രായേൽ മിലിട്ടറിയിലും ചോദിച്ച് നോക്ക്. മുൻ നിര പോരാളികൾ ലഹരി അടിച്ചിട്ടാണ് യുദ്ധത്തിന് പോകുന്നത്. തന്നെ നിയന്ത്രിക്കാൻ ആർക്കും കഴിയുന്നില്ലെന്നും സർക്കാർ ഉൾപ്പെടെ തന്നെ തുറന്നുവിട്ടിരിക്കുകയാണെന്നും വിനായകൻ പറയുന്നു. സ്വന്തം ലഹരി ഉപയോഗത്തെ ന്യായീകരിക്കാനായാണ് വിനായകൻ സൈനികർക്കെതിരെ നിന്ദ്യമായ വാക്കുകൾ ഉപയോഗിച്ചത്.
സോഷ്യൽ മീഡിയയിൽ നടത്തിയ അസഭ്യവർഷത്തെയും ഇയാൾ ന്യായീകരിക്കുന്നുണ്ട്. സിനിമാനടനായാൽ കാശുണ്ടാക്കി വീട്ടിലിരിക്കണമെന്നില്ല. സമൂഹത്തെ പൊട്ടന്മാരാക്കുന്നവരെ പൊളിക്കേണ്ടത് സാമൂഹിക ഉത്തരവാദിത്വമാണ്. അതിനായി ചില വാക്കുകൾ ഉപയോഗിക്കേണ്ടി വരുമെന്നും വിനായകൻ പറഞ്ഞു. മമ്മൂട്ടിയുടെ പുതിയ ചിത്രമായ കളങ്കാവലിന്റെ പ്രമോഷൻ പരിപാടിക്കിടെയാണ് വിനായകന്റെ ഗുരുതര പരാമർശം.
രാസലഹരിയും കഞ്ചാവും മദ്യവും ഉപയോഗിച്ച് പൊതുശല്യമായി മാറിയ നടനാണ് വിനായകൻ. നഗ്നത പ്രദർശനത്തിന്റെയും തെറിവിളിയുടെയും പേരിൽ നിരവധി തവണ ഇയാളെ പൊലീസ് കസ്റ്റഡിയിലെടുത്തിട്ടുണ്ട്.
