പൂനെ: അയോദ്ധ്യയിൽ ക്ഷേമത്തിന്റെ ധർമ പതാക ഉയർന്നതോടെ ശ്രീരാമക്ഷേത്ര നിർമാണം പൂർത്തിയായെന്നും ഇനി രാഷ്ട്രമന്ദിരത്തിന്റെ പൂർത്തീകരണമാണ് വേണ്ടതെന്നും ആർഎസ്എസ് സർസംഘചാലക് മോഹൻ ഭാഗവത്. ശക്തവും സുന്ദരവുമായ രാഷ്ട്ര നിർമാണത്തിന് ഒരുങ്ങണമെന്നും അദ്ദേഹം പറഞ്ഞു. സംഘശതാബ്ദി ആഘോഷങ്ങളുടെ ഭാഗമായി സംഘടിപ്പിച്ച പരിപാടിയിൽ സംസാരിക്കുകയായിരുന്നു അദ്ദേഹം.
സമൂഹം സംഘടിതമാകുമ്പോൾ മാത്രമേ രാഷ്ട്രം സമൃദ്ധമാകൂ. രാഷ്ട്രം ശക്തമാകുമ്പോൾ ലോകത്ത് സന്തോഷവും സമാധാനവും ഉണ്ടാവുകയുള്ളൂ. സമൂഹമൊന്നാകെ സജ്ജമായാൽ മാത്രമേ രാഷ്ട്രം മുന്നേറു. പ്രതിസന്ധികളുടെ കാലങ്ങളിൽ സമൂഹം സംഘത്തെ പിന്തുണച്ചു. അതിനാലാണ് സംഘം വളർന്നത്. സ്വയംസേവകർ പ്രാണസമർപ്പണം ചെയ്താണ് സംഘത്തെ കെട്ടിപ്പടുത്തത്.
അങ്ങേയറ്റം പ്രതികൂല സാഹചര്യങ്ങളിലൂടെ സംഘമെന്ന മഹാവൃക്ഷത്തെ വളർത്താൻ ജീവിതം മുഴുവൻ അധ്വാനിച്ച് ജീവൻ ബലിയർപ്പിച്ച ഡോ. ഹെഡ്ഗേവാറിനും, രാഷ്ട്രത്തിനുവേണ്ടി ജീവൻ ത്യജിച്ച പ്രചാരകരും ഗൃഹസ്ഥരുമായ സ്വയംസേവകർക്കുള്ളതാണ് ഈ കൃതജ്ഞതാ പുരസ്കാരമെന്ന് സർസംഘചാലക് പറഞ്ഞു.
