കേരളത്തിലെ ബ്രാഹ്മണ വിവാഹ ചടങ്ങുകൾ വളരെയധികം നീണ്ടുനിൽക്കുന്നതും വേദമന്ത്രങ്ങൾക്കും ശാസ്ത്രീയ വിധികൾക്കും മുൻഗണന നൽകുന്നവയുമാണ്. കേരളത്തിലെ ബ്രാഹ്മണ വിഭാഗങ്ങൾക്കിടയിൽ പിന്തുടരുന്ന വിവാഹ ചടങ്ങുകളെ ‘വേളി’ എന്നാണ് വിളിക്കുന്നത്. ഇവ പ്രധാനമായി പ്രകൃതിയുമായും അഗ്നിയുമായും ബന്ധപ്പെട്ട ആചാരങ്ങളാണ്. ഓരോ ചടങ്ങിനും കൃത്യമായ അർത്ഥതലങ്ങളുണ്ട്.
- >വിവാഹം ഉറപ്പിക്കുന്ന ചടങ്ങാണ് നിശ്ചയതാംബൂലം. ഇരു കുടുംബങ്ങളും തമ്മിൽ താംബൂലം (വെറ്റിലയും പാക്കും) കൈമാറുന്നതിലൂടെ ബന്ധം ഔദ്യോഗികമായി ഉറപ്പിക്കുന്നു.
- >ബ്രാഹ്മണ വിവാഹങ്ങളിലെ രസകരമായ ഒരു ചടങ്ങാണ് കാശി യാത്ര. സന്യാസം സ്വീകരിക്കാൻ കാശിയിലേക്ക് പോകാനൊരുങ്ങുന്ന വരനെ വധുവിന്റെ പിതാവ് തടയുകയും സംസാരജീവിതത്തിന്റെ ഗുണങ്ങൾ വിവരിച്ച് വധുവിനെ സ്വീകരിക്കാൻ അഭ്യർത്ഥിക്കുകയും ചെയ്യുന്നു.
- >വിവാഹത്തിന് തലേദിവസം വധൂവരന്മാർ സ്വന്തം വീടുകളിൽ വെച്ച് നടത്തുന്ന ചടങ്ങാണ് അയണി ഊണ്. സുമംഗലികളായ സ്ത്രീകൾ വധൂവരന്മാരെ വന്ദിക്കുകയും മംഗളാശംസകൾ നേരുകയും ചെയ്യുന്നു.
- >പിതൃക്കളുടെ അനുഗ്രഹം വാങ്ങുന്നതിനായി നടത്തുന്നതാണ് നന്ദീമുഖം. വിവാഹം തടസ്സമില്ലാതെ നടക്കാൻ ഇത് അനിവാര്യമാണെന്ന് വിശ്വസിക്കപ്പെടുന്നു.
- >വധുവും വരനും ആദ്യമായി പരസ്പരം കാണുന്ന നിമിഷമാണ് മുഖദർശനം. പണ്ടുകാലത്ത് മറക്കുടയ്ക്കുള്ളിലായിരുന്നു വധു നിന്നിരുന്നത്.
- >വിവാഹ വേദിയിൽ വധൂവരന്മാർ ഊഞ്ഞാലിൽ ഇരിക്കുന്ന ചടങ്ങാണ് ഊഞ്ഞാൽ ചടങ്ങ്. ജീവിതത്തിലെ കയറ്റിറക്കങ്ങളെ ഒന്നിച്ച് നേരിടണമെന്ന സന്ദേശമാണ് ഇതിലൂടെ നൽകുന്നത്. മുതിർന്ന സ്ത്രീകൾ അവർക്ക് ചുറ്റും പാട്ടുപാടി പാലും പഴവും നൽകുന്നു.
- >വധുവിന്റെ പിതാവ് വധുവിന്റെ കൈ വരന്റെ കയ്യിലേക്ക് ഏൽപ്പിച്ചു കൊടുക്കുന്നതാണ് കന്യാദാനം. ഇത് വളരെ വൈകാരികവും പവിത്രവുമായി കണക്കാക്കപ്പെടുന്നു.
- >വേദമന്ത്രങ്ങളുടെ അകമ്പടിയോടെ വരൻ വധുവിന്റെ കഴുത്തിൽ താലി കെട്ടുന്നുതാണ് മാംഗല്യധാരണം. മൂന്ന് കെട്ടുകളായാണ് ഇത് പൂർത്തിയാക്കുന്നത്.
- >പാണിഗ്രഹണം-വരൻ വധുവിന്റെ വലതുകൈ പിടിക്കുന്നു. “നിന്റെ കൈ ഞാൻ പിടിക്കുന്നത് സൗഭാഗ്യത്തിനാകട്ടെ” എന്ന മന്ത്രമാണ് ഇതിൽ പ്രധാനം.
- >വധുവിന്റെ സഹോദരൻ നൽകുന്ന നെൽപ്പൊരി (മലർ) വധൂവരന്മാർ ചേർന്ന് അഗ്നിയിൽ അർപ്പിക്കുന്നതാണ് ലാജഹോമം. ഇത് കുടുംബത്തിന്റെ ഐശ്വര്യത്തിനായി നടത്തുന്നതാണ്.
- >അശ്മാരോഹണം-വരൻ വധുവിന്റെ വലതുകാൽ എടുത്ത് അമ്മിയിൽ ചവിട്ടിക്കുന്നു. കല്ലുപോലെ ഉറച്ച മനസ്സുമായി ജീവിതത്തിലെ പ്രതിസന്ധികളെ നേരിടണം എന്നതാണ് ഇതിന്റെ തത്വം.
- >വരന്റെ പാദങ്ങൾ കഴുകി പൂജിക്കുന്നു, വധുവിന്റെ വീട്ടുകാർ നിർവ്വഹിക്കുന്ന ചടങ്ങാണ് പാദപൂജ.
- >വിവാഹത്തിലെ ഏറ്റവും പ്രധാന ചടങ്ങാണ് സപ്തപദി. വധൂവരന്മാർ അഗ്നിക്ക് ചുറ്റും ഏഴ് വട്ടം വലം വയ്ക്കുന്നു. ഓരോ ചുവടും ഓരോ പ്രതിജ്ഞയാണ്—ഭക്ഷണം, ആരോഗ്യം, സമ്പത്ത്, സന്തോഷം, സന്താനം, സൗഹൃദം, ആത്മീയത എന്നിവയ്ക്കായി ഇരുവരും ഒന്നിച്ചു നിൽക്കുമെന്ന് ഇതിലൂടെ ഉറപ്പിക്കുന്നു.
- >വധു വരന്റെ വീട്ടിലേക്ക് ആദ്യമായി പ്രവേശിക്കുന്ന ചടങ്ങാണ് ഗൃഹപ്രവേശം. മഹാലക്ഷ്മിയായാണ് വധുവിനെ വരന്റെ വീട്ടുകാർ വരവേൽക്കുന്നത്.
- >രാത്രിയിൽ ആകാശത്തിലെ സപ്തർഷി മണ്ഡലത്തിലെ വസിഷ്ഠനെയും അരുന്ധതിയെയും വധൂവരന്മാർ വന്ദിക്കുന്നു. ഇതാണ് അരുന്ധതി ദർശനം. ദാമ്പത്യ ജീവിതത്തിൽ പുലർത്തേണ്ട വിശ്വസ്തതയുടെയും സ്നേഹത്തിന്റെയും പ്രതീകമാണിത്.
ഈ ആചാരങ്ങളെല്ലാം തന്നെ പ്രകൃതിയും മനുഷ്യനും തമ്മിലുള്ള ബന്ധത്തെയും, കുടുംബജീവിതത്തിന്റെ ഉത്തരവാദിത്തങ്ങളെയും ഓർമ്മിപ്പിക്കുന്നു.
