തിരുവനന്തപുരം: കേരളത്തില്‍ വോട്ടെടുപ്പിന് ഇനി വെറും 72 മണിക്കൂറുകള്‍ മാത്രം ബാക്കിനില്‍ക്കെ, സംസ്ഥാനത്ത് എന്‍ഡിഎ തരംഗം സൃഷ്ടിക്കാന്‍ കേന്ദ്ര ആഭ്യന്തര മന്ത്രി അമിത് ഷാ നേരിട്ട് രംഗത്ത്. ബിജെപിയുടെ 47-ാം സ്ഥാപക ദിനമായ ഇന്ന്, തിരുവനന്തപുരത്തെ പാര്‍ട്ടി ആസ്ഥാനത്ത് പതാക ഉയര്‍ത്തുന്നതോടെ സമാപനഘട്ട പ്രചാരണത്തിന് പുതിയ ഊര്‍ജ്ജം കൈവരും. തിരുവനന്തപുരം പിടിച്ചെടുക്കാന്‍ ലക്ഷ്യമിട്ട് ദേശീയ നേതാക്കളുടെയും പ്രമുഖ വ്യക്തിത്വങ്ങളുടെയും വലിയ നിരയാണ് തലസ്ഥാനത്ത് തമ്പടിച്ചിരിക്കുന്നത്.
വിവിധ പ്രചാരണ പരിപാടികളിലും തന്ത്രപരമായ ചര്‍ച്ചകളിലും ജില്ലയില്‍ ഉടനീളം അദ്ദേഹം പങ്കെടുക്കും. കേന്ദ്ര കൃഷി മന്ത്രിയും ബിജെപിയുടെ കരുത്തനായ നേതാവുമായ അദ്ദേഹം കര്‍ഷക മേഖലകളില്‍ കേന്ദ്രീകരിച്ചുള്ള പ്രചാരണങ്ങള്‍ക്ക് നേതൃത്വം നല്‍കുന്നു. ബിജെപി ദേശീയ അധ്യക്ഷന്‍ പ്രചാരണ പ്രവര്‍ത്തനങ്ങള്‍ നേരിട്ട് ഏകോപിപ്പിക്കുന്നു. അന്താരാഷ്‌ട്ര ടെന്നീസ് താരം ലിയാണ്ടര്‍ പെയ്സിന്റെ സാന്നിധ്യം യുവാക്കള്‍ക്കിടയില്‍ വലിയ തരംഗം സൃഷ്ടിക്കുന്നുണ്ട്.
തിരഞ്ഞെടുപ്പ് അവസാന നിമിഷങ്ങളിലേക്ക് കടക്കുമ്പോള്‍ യുഡിഎഫിനെയും എല്‍ഡിഎഫിനെയും പ്രതിക്കൂട്ടിലാക്കുന്ന വിവാദങ്ങളാണ് ചര്‍ച്ചകളില്‍ നിറയുന്നത്. കണ്ണൂരില്‍ വ്യാജ ആധാര്‍ കാര്‍ഡുകള്‍ നിര്‍മ്മിക്കുന്നു എന്ന ഗുരുതരമായ ആരോപണം ഇടതുമുന്നണിയെ പ്രതിരോധത്തിലാക്കിയിട്ടുണ്ട്. കോണ്‍ഗ്രസ് വയനാട് ദുരിതാശ്വാസ ഫണ്ട് വെട്ടിച്ചെന്ന ആരോപണവും വോട്ടര്‍മാര്‍ക്കിടയില്‍ വലിയ ചര്‍ച്ചയാകുന്നു. നില മെച്ചപ്പെടുത്താനുള്ള അവസാന ശ്രമമെന്ന നിലയില്‍ വട്ടിയൂര്‍ക്കാവില്‍ കെ. മുരളീധരനായി ഡി.കെ. ശിവകുമാറിനെ എത്തിച്ച് റോഡ് ഷോ സംഘടിപ്പിക്കാനാണ് കോണ്‍ഗ്രസ് നീക്കം.
നാളെ പരസ്യ പ്രചാരണം അവസാനിക്കാനിരിക്കെ, കേരളം കണ്ടിട്ടുള്ളതില്‍ വെച്ച് ഏറ്റവും വലിയ ശക്തിപ്രകടനത്തിനാണ് എന്‍ഡിഎ ഒരുങ്ങുന്നത്. വിവാദങ്ങളില്‍ ഉഴലുന്ന മുന്നണികള്‍ക്ക് പകരം വികസനവും സുരക്ഷയും മുന്‍നിര്‍ത്തി വോട്ടുറപ്പിക്കാനാണ് ബിജെപി സ്ഥാനാര്‍ത്ഥികളുടെ ശ്രമം. നാളത്തെ കലാശക്കൊട്ടോടെ പ്രചാരണ രംഗം നിശബ്ദ പ്രചാരണത്തിലേക്ക് വഴിമാറും. ഏപ്രില്‍ 9-നാണ് കേരളം പോളിങ് ബൂത്തിലെത്തുന്നത്.
