കൊച്ചി: ജനപ്രിയ നടി മഞ്ജു വാര്യര്‍ പങ്കെടുത്ത പൊതുപരിപാടിക്കിടെയുണ്ടായ അപ്രതീക്ഷിത സംഭവങ്ങളുടെ വീഡിയോ ചര്‍ച്ചയാകുന്നു. ഒരു ജ്വല്ലറി ഉദ്ഘാടന വേദിയിലാണ് താരത്തിന് നേരെ ആരാധകയുടെ അതിക്രമമുണ്ടായത്. ഉദ്ഘാടന ചടങ്ങിനായി വേദിയില്‍ നില്‍ക്കുകയായിരുന്ന മഞ്ജു വാര്യരുടെ അടുത്തേക്ക് തിരക്കിനിടയില്‍ നിന്ന് ഒരു യുവതി ഓടിയെത്തുകയായിരുന്നു. സുരക്ഷാ ഉദ്യോഗസ്ഥരെ വെട്ടിച്ച് വേദിയിലെത്തിയ ഇവര്‍ നടിയെ ബലമായി കെട്ടിപ്പിടിക്കുകയും ചുംബിക്കാന്‍ ശ്രമിക്കുകയും ചെയ്തു. അപ്രതീക്ഷിതമായ ഈ നീക്കത്തില്‍ മഞ്ജു വാര്യരും ഒപ്പമുണ്ടായിരുന്ന അവതാരക മീര അനിലും ഒരു നിമിഷം അമ്പരന്നുപോയി.
ഉടന്‍തന്നെ സുരക്ഷാ ചുമതലയുള്ളവര്‍ ഇടപെട്ട് യുവതിയെ വേദിയില്‍ നിന്ന് മാറ്റി. പരിഭ്രമം പ്രകടിപ്പിച്ചെങ്കിലും താരം ഉടന്‍ തന്നെ സ്വയം നിയന്ത്രിക്കുകയും ചടങ്ങുമായി മുന്നോട്ട് പോവുകയും ചെയ്തു. സംഭവത്തിന്റെ വീഡിയോ പ്രചരിച്ചതോടെ വലിയ രീതിയിലുള്ള വിമര്‍ശനങ്ങളാണ് ഉയരുന്നത്. സ്‌നേഹപ്രകടനം എന്നതിലുപരി ഒരാളുടെ സ്വകാര്യതയിലേക്കും ശരീരത്തിലേക്കും അനുവാദമില്ലാതെ കടന്നുകയറുന്നത് അംഗീകരിക്കാനാവില്ലെന്ന് ആരാധകര്‍ പറയുന്നു.
A Woman kissed Malayalam Actress Manju Warrier in a public function#ManjuWarrier#RegalJewellerypic.twitter.com/n2QnO9Fnrj
— Varun R 🇮🇳 (@VarunNR_79) April 5, 2026
ഇത്രയും വലിയൊരു ചടങ്ങില്‍ താരത്തിന് മതിയായ സുരക്ഷ ഒരുക്കുന്നതില്‍ സംഘാടകര്‍ പരാജയപ്പെട്ടുവെന്ന് പലരും ചൂണ്ടിക്കാട്ടി. ഒരു സാധാരണ ആരാധകയ്‌ക്ക് ഇത്ര എളുപ്പത്തില്‍ വേദിയിലേക്ക് അതിക്രമിച്ചു കയറാന്‍ കഴിഞ്ഞത് ഗുരുതരമായ വീഴ്ചയാണെന്നാണ് വിലയിരുത്തല്‍. താരങ്ങളുടെ സുരക്ഷ ഉറപ്പാക്കാന്‍ കൂടുതല്‍ കര്‍ശനമായ പ്രോട്ടോക്കോളുകള്‍ വേണമെന്ന ആവശ്യവും ഇതോടെ ശക്തമായിരിക്കുകയാണ്. നേരത്തെയും സമാനമായ രീതിയില്‍ പല സിനിമാ താരങ്ങള്‍ക്കും ആരാധകരില്‍ നിന്ന് മോശം അനുഭവങ്ങള്‍ നേരിടേണ്ടി വന്നിട്ടുണ്ട്. മുതിര്‍ന്ന താരങ്ങള്‍ പോലും ഇത്തരത്തില്‍ ‘ക്രേസി’ ആരാധനയുടെ ഇരകളാകുന്നത് ആശങ്കാജനകമാണെന്ന് സിനിമാ ലോകം പ്രതികരിക്കുന്നു.
