തിരുവനന്തപുരം: നിയമസഭാ തിരഞ്ഞെടുപ്പിന്റെ വോട്ടെടുപ്പ് കണക്കിലെടുത്ത് സംസ്ഥാനത്ത് മദ്യവില്‍പനയ്‌ക്ക് കര്‍ശന നിരോധനം ഏര്‍പ്പെടുത്തി. ഏപ്രില്‍ 9-ന് നടക്കുന്ന വോട്ടെടുപ്പിന് മുന്നോടിയായി ചൊവ്വാഴ്ച (നാളെ) വൈകീട്ട് മുതല്‍ വ്യാഴാഴ്ച വൈകീട്ട് വരെയാണ് ആദ്യഘട്ട നിയന്ത്രണം. വോട്ടെണ്ണല്‍ ദിനമായ മെയ് 4-നും സംസ്ഥാനം പൂര്‍ണ്ണമായും ഡ്രൈ ഡേ ആയിരിക്കും.
ജനപ്രാതിനിധ്യ നിയമപ്രകാരം വോട്ടെടുപ്പ് അവസാനിക്കുന്നതിന് 48 മണിക്കൂര്‍ മുന്‍പ് മുതല്‍ ലഹരിപദാര്‍ത്ഥങ്ങളുടെ വിതരണവും വല്‍പ്പനയും തടയണമെന്നാണ് ചട്ടം. ഏപ്രില്‍ 7 (ചൊവ്വാഴ്ച) വൈകീട്ട് 7 മണി മുതല്‍ ആരംഭിക്കുന്ന് ഡ്രൈ ഡേ ഏപ്രില്‍ 9 (വ്യാഴാഴ്ച) വോട്ടെടുപ്പ് അവസാനിക്കുന്നത് വരെയായിരിക്കും. മെയ് നാല് വോട്ടെണ്ണല്‍ ദിനത്തില്‍ രാവിലെ മുതല്‍ ഫലപ്രഖ്യാപനം പൂര്‍ത്തിയാകുന്നത് വരെ മദ്യശാലകള്‍ തുറക്കില്ല.
ബെവ്‌കോ ഔട്ട്ലെറ്റുകള്‍, കള്ളുഷാപ്പുകള്‍ എന്നിവയ്‌ക്ക് പുറമെ ബാറുകള്‍, ക്ലബ്ബുകള്‍, സ്റ്റാര്‍ ഹോട്ടലുകള്‍, റെസ്റ്റോറന്റുകള്‍ തുടങ്ങി മദ്യം വിളമ്പുന്ന എല്ലാ സ്ഥാപനങ്ങള്‍ക്കും ഈ നിരോധനം ബാധകമാണ്. നിയമം ലംഘിച്ച് മദ്യം വിളമ്പുന്ന സ്ഥാപനങ്ങള്‍ക്കെതിരെ കര്‍ശന നടപടി സ്വീകരിക്കാന്‍ എക്‌സൈസ് കമ്മീഷണര്‍ക്കും പോലീസിനും തിരഞ്ഞെടുപ്പ് കമ്മീഷന്‍ നിര്‍ദ്ദേശം നല്‍കിയിട്ടുണ്ട്.
തിരഞ്ഞെടുപ്പ് അട്ടിമറിക്കാനോ വോട്ടര്‍മാരെ സ്വാധീനിക്കാനോ ലഹരിവസ്തുക്കള്‍ ഉപയോഗിക്കുന്നത് തടയാന്‍ അതിര്‍ത്തി മേഖലകളില്‍ പരിശോധന കര്‍ശനമാക്കി. അയല്‍ സംസ്ഥാനങ്ങളില്‍ നിന്നുള്ള മദ്യക്കടത്ത് തടയാന്‍ പ്രത്യേക സ്‌ക്വാഡുകളെ നിയോഗിച്ചിട്ടുണ്ട്. വ്യക്തികള്‍ മദ്യം ശേഖരിച്ചുവെക്കുന്നതും നിയമവിരുദ്ധമായി വിതരണം ചെയ്യുന്നതും ശ്രദ്ധയില്‍പ്പെട്ടാല്‍ കര്‍ശനമായ ക്രിമിനല്‍ നടപടികള്‍ നേരിടേണ്ടി വരുമെന്നും അധികൃതര്‍ മുന്നറിയിപ്പ് നല്‍കി.
ഏതെങ്കിലും ബൂത്തുകളില്‍ റീപോളിംഗ് ആവശ്യമായി വന്നാല്‍ ആ ദിവസവും ബന്ധപ്പെട്ട മണ്ഡല പരിധിയില്‍ മദ്യനിരോധനം ബാധകമായിരിക്കും. വോട്ടെടുപ്പ് സമാധാനപരമായി പൂര്‍ത്തിയാക്കുന്നതിന്റെ ഭാഗമായാണ് ഈ നടപടി.
