കണ്ണൂര്‍: സഹപ്രവര്‍ത്തകയെയും വീട്ടുകാരെയും നടുക്കിയ കരിവെള്ളൂര്‍ ദിവ്യശ്രീ വധക്കേസില്‍ പ്രതിയായ ഭര്‍ത്താവ് രാജേഷിന് (കൊഴുമ്മല്‍ സ്വദേശി) കോടതി കടുത്ത ശിക്ഷ വിധിച്ചു. മൂന്ന് ജീവപര്യന്തം തടവിനും രണ്ട് ലക്ഷം രൂപ പിഴയ്‌ക്കുമുള്ള ശിക്ഷയാണ് കോടതി പ്രഖ്യാപിച്ചത്. 2024-ല്‍ കേരള പൊലീസിലെ സിവില്‍ പൊലീസ് ഓഫീസറായ ദിവ്യശ്രീയെ പിതാവിന്റെ വീട്ടില്‍ വെച്ച് രാജേഷ് ക്രൂരമായി കൊലപ്പെടുത്തുകയായിരുന്നു.
മാങ്ങാട്ടുപറമ്പ് ബറ്റാലിയനിലെ ഉദ്യോഗസ്ഥയായിരുന്ന ദിവ്യശ്രീ, ഭര്‍ത്താവിന്റെ പീഡനം സഹിക്കവയ്യാതെ വിവാഹമോചനത്തിനൊരുങ്ങുകയായിരുന്നു. ഇതിന്റെ ഭാഗമായി നടന്ന കൗണ്‍സിലിംഗിനിടെ രാജേഷിന്റെ ലഹരി ഉപയോഗത്തെക്കുറിച്ചും പണം ധൂര്‍ത്തടിക്കുന്നതിനെക്കുറിച്ചും ദിവ്യശ്രീ തുറന്നു പറഞ്ഞത് പ്രതിയെ പ്രകോപിപ്പിച്ചു. രാജേഷിന്റെ ആവശ്യങ്ങള്‍ക്കായി ദിവ്യശ്രീ ലക്ഷങ്ങള്‍ ചെലവാക്കിയിരുന്നു. പ്രതിക്ക് ടാക്‌സിയും ബൈക്കും വാങ്ങി നല്‍കിയതും ഭാര്യവീട്ടുകാരായിരുന്നു. വിവാഹമോചനം നേടിയാല്‍ തന്റെ സാമ്പത്തിക സ്രോതസ്സ് ഇല്ലാതാകുമെന്ന് രാജേഷ് ഭയപ്പെട്ടിരുന്നതായി പൊലീസ് അന്വേഷണത്തില്‍ വ്യക്തമായി.
സംഭവം നടന്ന ദിവസം ബൈക്കിലെത്തിയ രാജേഷ്, ദിവ്യശ്രീയെ വടിവാള്‍ ഉപയോഗിച്ച് ശരീരമാസകലം വെട്ടുകയായിരുന്നു. മകളെ രക്ഷിക്കാന്‍ ശ്രമിച്ച പിതാവ് കെ. വാസുവിനും ആക്രമണത്തില്‍ ഗുരുതരമായി പരിക്കേറ്റു. ശരീരത്തിലേറ്റ നിരവധി വെട്ടുകള്‍ക്ക് പുറമെ, ചെവിക്ക് പിന്നിലേറ്റ ആഴത്തിലുള്ള മുറിവാണ് മരണകാരണമായത്. കൊലയ്‌ക്ക് ശേഷം വാള്‍ പുഴയിലെറിഞ്ഞ പ്രതി ബാറിലിരുന്ന് മദ്യപിക്കവേയാണ് പിടിയിലായത്.
ഏറെ കഷ്ടപ്പെട്ട് പഠിച്ച് പൊലീസ് ജോലി നേടിയ ദിവ്യശ്രീയായിരുന്നു ആ കുടുംബത്തിന്റെ ഏക താങ്ങും മകന്റെ ഏക ആശ്രയവും. ജോലിയില്‍ പ്രവേശിച്ച ശേഷവും രാജേഷ് നിരന്തരം ശല്യം ചെയ്തിരുന്നതായും, മുന്‍പ് വസ്തു തര്‍ക്കത്തിന്റെ പേരില്‍ ദിവ്യശ്രീയുടെ സഹോദരിയെ ബൈക്ക് കയറ്റി കൊല്ലാന്‍ ശ്രമിച്ചതായും നാട്ടുകാര്‍ സാക്ഷ്യപ്പെടുത്തി.
സമൂഹമനസാക്ഷിയെ ഞെട്ടിച്ച ഈ കൊലപാതകത്തില്‍ ശാസ്ത്രീയ തെളിവുകളുടെയും സാക്ഷിമൊഴികളുടെയും അടിസ്ഥാനത്തിലാണ് കോടതി ശിക്ഷ വിധിച്ചത്. പീഡനവിവരങ്ങള്‍ പുറത്തുപറഞ്ഞതിനും നിയമപരമായി ബന്ധം വേര്‍പെടുത്താന്‍ ശ്രമിച്ചതിനുമുള്ള പ്രതികാരമാണ് ഒരു ജീവനെടുത്തതെന്ന് പ്രോസിക്യൂഷന്‍ കോടതിയില്‍ വാദിച്ചു.
