വെഡ്ഡിംഗ് ഫോട്ടോഗ്രാഫി: ക്ലിക്ക് മാറ്റുന്ന പുതിയ കാലത്തെ ട്രെൻഡുകൾ

വിവാഹം എന്നത് കേവലം ഒരു ചടങ്ങല്ല, മറിച്ച് ജീവിതകാലം മുഴുവൻ സൂക്ഷിച്ചുവെക്കാനുള്ള മനോഹരമായ ഓർമ്മകളുടെ ശേഖരമാണ്. അതുകൊണ്ടുതന്നെ ഇന്ന് വിവാഹത്തേക്കാൾ പ്രാധാന്യം പലരും നൽകുന്നത് ആ നിമിഷങ്ങളെ ക്യാമറയിൽ പകർത്തുന്നതിനാണ്. ‘സേവ് ദ ഡേറ്റ്’ മുതൽ ‘പോസ്റ്റ് വെഡ്ഡിംഗ്’ വരെ നീളുന്ന ഫോട്ടോഗ്രാഫി ലോകത്തെ ഏറ്റവും പുതിയ വിശേഷങ്ങൾ നോക്കാം.

1. സേവ് ദ ഡേറ്റ്: കഥ പറയുന്ന ചിത്രങ്ങൾ

പഴയതുപോലെ വെറുതെ ഒരു ഡേറ്റ് എഴുതിയ ബോർഡും പിടിച്ച് നിൽക്കുന്ന രീതിയല്ല ഇപ്പോൾ ഓരോ ‘സേവ് ദ ഡേറ്റ്’ ഷൂട്ടും ഒരു ചെറിയ സിനിമ പോലെയാണ്. വധൂവരന്മാർ ആദ്യമായി കണ്ടുമുട്ടിയ രീതിയോ അവരുടെ പ്രണയകഥയോ കോർത്തിണക്കിയുള്ള പ്രമേയങ്ങളാണ് ഇന്ന് ഓരോ ‘സേവ് ദ ഡേറ്റും.

പ്രിയപ്പെട്ട സിനിമകളിലെ രംഗങ്ങളോ പാട്ടുകളോ പുനരാവിഷ്കരിക്കുന്ന രീതിയും ട്രെൻഡായി മാറുന്നുണ്ട്.
അമിതമായ ആഭരണങ്ങളോ ആഡംബര വസ്ത്രങ്ങളോ ഒഴിവാക്കി, ലളിതമായ വസ്ത്രങ്ങൾ ധരിച്ചുള്ള ‘നാച്ചുറൽ ഷൂട്ടുകൾ’ പലരും തിരഞ്ഞെടുക്കുന്നു.

2. ലൊക്കേഷനിലെ വൈവിധ്യം

സ്റ്റുഡിയോ സെറ്റുകളിൽ നിന്ന് ഷൂട്ടുകൾ പ്രകൃതിയുടെ മടിത്തട്ടിലേക്ക് മാറി. മൂന്നാർ പോലുള്ള ഹിൽ സ്റ്റേഷനുകൾ, ആലപ്പുഴയിലെ കായലുകൾ, വർക്കലയിലെ ക്ലിഫ് എന്നിവിടങ്ങൾ സ്ഥിരം വേദികളാണ്. കൊട്ടാര സമാനമായ റിസോർട്ടുകളും പൗരാണിക പ്രാധാന്യമുള്ള കെട്ടിടങ്ങളും പശ്ചാത്തലമാക്കി ഷൂട്ട് ചെയ്യുന്നത് ഒരു ആഢ്യത്വം നൽകുന്നു.

3. കാൻഡിഡ് ഫോട്ടോഗ്രാഫി

ക്യാമറയിലേക്ക് നോക്കി ചിരിക്കാൻ പറയുന്ന പഴയ രീതി മാറി. ചിരിയും കളിയും സങ്കടവും അപ്രതീക്ഷിതമായ ചലനങ്ങളും ഒപ്പിയെടുക്കുന്ന ‘കാൻഡിഡ്’ ചിത്രങ്ങൾക്കാണ് ഇന്ന് മൂല്യം കൂടുതൽ. വിവാഹ ചടങ്ങുകൾക്കിടയിലെ സ്വാഭാവികമായ വികാരങ്ങൾ പകർത്തുന്നതിലാണ് ഫോട്ടോഗ്രാഫർമാർ ഇന്ന് ശ്രദ്ധ കേന്ദ്രീകരിക്കുന്നത്.

4. പോസ്റ്റ് വെഡ്ഡിംഗ്:

വിവാഹദിവസത്തെ തിരക്കിനിടയിൽ ഫോട്ടോകൾക്ക് വേണ്ടി സമയം കണ്ടെത്താൻ കഴിയാത്തവർക്കാണ് പോസ്റ്റ് വെഡ്ഡിംഗ് ഷൂട്ടുകൾ ആശ്വാസമാകുന്നത്. സമയ പരിധി ഇല്ലാതെ പല ലോക്കേഷനുകളും ഇതിനായി തിരഞ്ഞെടുക്കാം. ഇന്ന് വിവാഹത്തിന്റെ അവിഭാജ്യ ഘടകമായി ഇത് മാറിക്കഴിഞ്ഞു.

5. ഡ്രോൺ ഫോട്ടോഗ്രാഫി

ആകാശക്കാഴ്ചകൾ നൽകുന്ന ഡ്രോൺ ക്യാമറകൾ ഇന്ന് ഒഴിച്ചുകൂടാനാവാത്തതാണ്. വിവാഹ പന്തലിന്റെ വലിപ്പവും പ്രകൃതിഭംഗിയും ഒരേപോലെ പകർത്താൻ ഡ്രോണുകൾ സഹായിക്കുന്നു. സാങ്കേതികവിദ്യ വളരുന്നതിനനുസരിച്ച് വെഡ്ഡിംഗ് ഫോട്ടോഗ്രാഫിയും അതിരുകൾ ഭേദിക്കുകയാണ്. വെറും ചിത്രങ്ങൾ എന്നതിലുപരി ജീവിതത്തിലെ പ്രീയപ്പെട്ട നിമിഷങ്ങളാണ് ക്യാമറയിലൂടെ പകർത്തുന്നത്. ആഡംബരങ്ങൾക്കിടയിൽ ആ നിമിഷങ്ങളുടെ സ്വാഭാവികത നഷ്ടപ്പെടാതെ സൂക്ഷിക്കുക എന്നതാണ് ഏറ്റവും പ്രധാനം.